容祖兒跳舞後遺傷頸軟骨

天后容祖兒昨日一身高貴Look出席活動,透露日前發現左邊頸軟骨凸出,應是長期未熱夠身跳舞及不停「咯頸」的後遺症。祖兒鐵定明年三月底於演藝學院舉行暫定十場Side Track演唱會,並笑指為杜絕「黃牛黨」有意唱足一年。

容祖兒昨日以黑色露肩連身裙出席澳門威尼斯人購物中心舉行的聖誕樹亮燈活動,獲大會送上一對巨型水晶耳環,童心未泯的祖兒面對掛滿水晶的聖誕樹表現興奮。不時用手按頸的祖兒透露近日發現軟骨凸了出來,記者笑指被男友劉浩龍攬住瞓所致?祖兒即笑說:「攬你個死人頭。」

她隨即表示乃長期跳舞的後遺症:「可能我成日『咯』條頸,長期有個壞習慣,同埋跳舞熱身唔夠係咁揈頭,久而久之硬到舊骨凸出嚟。」並透露現時頭部不能擰左,祖兒說:「揈頭去左邊會冇力同埋好痛,要睇醫生,之前為條頸睇咗七、八次醫生,遲吓會照磁力共振。」自爆聖誕節正日冇人約的祖兒,被問到是否準備好聖誕禮物給男友?她說:「未。(包住自己送畀佢?)根本我係上天賜畀大家嘅禮物。」

三月底開show十場

由於祖兒早前曾表示有意舉行Side Track演唱會,問到進度如何?祖兒終於公布舉行場地及時間:「三月底,會喺演藝學院,暫定做十場,物以罕為貴。(又益黃牛黨?)係啦,點先可以杜絕?(開三十場?)三十場都係三萬人。(唱一年?)都好,不過好攰,唱三日抖四日。」對於樂壇頒獎禮即將舉行,祖兒表示要「睇時間」:「依家仲未知。(叱咤用至尊歌曲大獎利誘你去?)冇可能,不過一月一日都想見大家,一年嘅新開始。」

文:音樂組