野心家黃宗澤：唔結婚都得啫！

陪家人：喺屋企食飯已經好開心

藝人黃宗澤（Bosco）在無綫台慶劇《幕後玩家》飾演公關公司總監，為人深藏不露，同時為求目的不擇手段。他坦言劇集雖然呈現人性陰暗面，但角色亦放棄不少美好事情，有如硬幣有公字兩面，屬無綫劇少見的題材：「好真實，好想試吓觀眾嘅口味！」就算連拍攝前的準備都同以前唔同：「拍咗咁多年無綫劇，我係未試過圍讀，我初初都心裏面問係咪真係要？但係原來咁樣可以摸摸人哋個底，因為好多人未合作過，了解吓佢大概會點演繹，對我哋做功課其實都有幾大好處。」

在一眾未曾合作過的演員中，Bosco點名對張繼聰的印象最深：「你知佢幾古靈精怪(口架)啦，呢條友真係一隻電兔嚟，長時間都有電，就算捱到幾眼瞓，拍到凌晨三四點，第二朝接七八點，都一樣有電！」他又指飾演其老婆的龔嘉欣演出令人眼前一亮：「佢個角色都幾難演，有好多喊戲，仲要去到最後佢係有少少抑鬱症等等精神上嘅病，我睇見佢都覺得攰到爆！」問他的角色是否一樣甚有難度，他即說：「係有啲難度，收埋好多秘密，連身邊嘅人好似老婆、兄弟都唔知，可想而知佢嘅隱藏掩飾得幾咁犀利！」

放大圖片	放大圖片	放大圖片

雖然角色如此深沉內斂，但Bosco表示現實中自己並非如此，就算有事都不會收收埋埋：「邊有得收埋。（講出嚟？）屋企人會少啲，有幾個兄弟由細識到大，會同佢哋傾。」戲如人生，問他曾否放棄一些珍而重之的事情，他直言始終有一樣東西他絕不放棄：「點放棄都放棄唔到屋企，就算我返大陸拍嘢，其實係好掛住自己屋企。去年爸爸走咗，決定咗以後農曆新年嗰幾日就乜都唔做，全情陪屋企人，唔使話搵特別節目周圍去，靜靜哋咁相處吓，喺屋企食吓飯已經好開心。」他指父親離世前十年，撞正自己事業搏殺期，所以總有留下遺憾。

Bosco於《幕》劇與不少新拍檔合作，笑指張繼聰長期上滿電。	張繼聰（右）	放大圖片

工作狂：停一個禮拜都唔掂

經常往返中港參與演藝工作的Bosco，除了經營蠔吧，還要打理紅酒生意，問有否想過減產暫停一下，他直指自己是工作狂：「乜都唔做，我諗多過一個禮拜我都唔掂，會自動自覺搵啲嘢嚟搞。（咁仲識唔識到女仔？）隨緣啦！個天要畀你遇到，點都畀你遇到喎！（之前嗰啲冇晒下文？）再講啦，呢啲！（日模呢？）有聯絡嘅。（就嚟36歲，唔諗成家立室？）屋企人又唔急，我又唔急。唔知係咪因為我喺單親家庭長大，我唔會排結婚呢樣嘢喺第一位。」

Bosco曾被拍得與日模JUN拍拖，他指雙方仍有聯絡。	放大圖片	自認野心大的Bosco，演藝及飲食生意忙不停。

雖然暫時未有結婚打算，但Bosco於訪問中坦言羨慕張繼聰有一個幸福家庭，再問他有否閃過結婚念頭，他即說：「可能未去到阿聰嗰個心理階段，佢人生好似好滿足咁，可能同阿聰性格唔太一樣，我比較有野心。（之前有冇試過有呢個衝動？）冇，但有時會諗我結咗婚會點，一諗就發現我唔會有好多時間陪到屋企人。當有一日覺得可以慢啲，停一輪，或者我會諗。（最後搞到冇得結點算？）依家新時代，唔結婚都得(口架)啫！但終有一日我都會結。（見到前女友胡杏兒結婚好開心？）好開心，從個心裏面祝福佢！」

為錢決裂：防人之心不可無

《幕》劇中，Bosco身邊有情婦劉佩玥，之前雖然表示不論怎樣也會與老婆龔嘉欣好好過，但最終劇情說到他與老婆會離婚，之後更搞到與張繼聰、蕭正楠兄弟關係破裂，角色絕對是為求目的，不惜一切。

談到兄弟決裂情節，Bosco坦言自己亦有類似經歷：「啲錢銀問題。（幾時？）早幾年前，由細讀書識到大，愈來愈覺得有問題，同班朋友商量過，覺得唔可以繼續咁同佢相處，做唔到兄弟，唔係有仇嘅，唔係話要憎佢，只係變成Hi Bye Friend，唔會有咩特別交往。（怕識新朋友？）冇得話怕，但老土啲講句，防人之心不可無，認識耐啲，觀察耐啲先至交心。（最甘呢次？）可以話係，錢唔係問題，係咁多年嘅感情喎，到頭來原來係咁，覺得好可惜。」

文：影視組

攝：吳文聰

造型：queenieyu

髮型：Kel Fung@HH hair.nail

化妝：Miko Wong@Cyrus Lee T