許冠文爭金馬影帝：敬老頒畀我！
許冠文囝囝許思維拍攝紀錄片向電影海報大師阮大勇致敬，更「設局」擺老竇上枱客串一角，令許冠文「中伏」！談到許冠文入圍爭金馬影帝，他笑指就算得獎都是因為評審敬老：「就人道立場畀個獎我！」
喜劇泰斗許冠文（Michael）愛兒許思維透過執導紀錄片《海報師》，向電影海報畫家阮大勇致敬，亦趁《半斤八両》40周年，令觀眾以另一面來重溫港產片黃金時代。談到拍攝原因，思維稱有日收到媽媽「柯打」執拾爸爸公司倉庫，發現封塵雜物中藏有不少經典電影的海報和菲林：「啲菲林藥水仲發埋臭，打電話畀爹哋媽咪，爹哋竟然話掉晒佢就得！」Michael說：「我真係咁講咩？但真係發霉嘛，有DVD做底都得啦！」但思維卻覺得應該紀錄這段歷史，最後決定將瑰寶好好「安葬」在香港電影資料館。問找尋神隱的海報大師阮大勇是否甚有難度？思維直言難度極大：「佢好多年前移咗民，高志森、陳欣健、曾志偉都唔知點搵佢。」最後發現原來他已回流香港，更在社交網站上有帳戶，經幾個月聯絡才請到對方出山。
讚子有創意
問Michael會否因囝囝「做台好戲」而感到自豪？他笑說：「佢可能撞彩啫！不過我真係覺得佢好有創意，因為佢話我幾乎全部片都係阮大勇畫海報，但我竟然同佢開得一次會咁少，講講吓真係有少少覺得對阮大勇唔住！」而思維亦透露爸爸在戲中有「客串」一角，安排他與阮大勇再遇，被「擺上枱」的Michael即大爆：「呢個客串我自己都唔知！佢話不如幾點鐘返寫字樓傾傾偈，點知一開門阮大勇就喺度！」
講國語衰收尾
談到Michael憑《一路順風》角色獲今屆金馬獎影帝提名，且呼聲最高，他笑指就算得獎都應該是「敬老獎」：「38年前提名過，我以為之後都有好多提名，點知冇。我諗佢哋知我冇另外一個38年，就人道立場畀個獎我咁。」又自爆因國語不濟，讀長鏡頭對白時經常「臨尾香」：「拍晒之後，導演叫我留多晚補拍第一日個景多次，話之後請我飲酒食飯，最後出街佢用最後嗰次，原來第一日佢係唔收貨！」思維亦笑說：「佢國語真係幾差！」談到Michael是遠近馳名的「機關槍嘴」，問思維可覺爸爸講嘢太快？他說：「日常生活唔係好快，通常佢講嚟講去都係嗰幾句，『邊度食飯？』『有冇魚食？』」Michael笑說：「我成日食魚咩？」非常搞笑。
場地：紅磡都會海逸酒店 The Patio Bar
文：影視組
攝：黎志輝