與許廷鏗「天生一對」 欣宜預告有料爆！

歌手鄭欣宜與許廷鏗（Alfred）向來非常老友，但亦因為他們經常出雙入對，讓不少人誤會兩人是一對！他們昨日孖住現身美麗華商場出席「Who Moved My Christmas Tree？」聖誕活動揭幕禮時，Alfred自爆日前工作見到譚玉瑛，對方很凝重地問他是否與欣宜拍拖：「都係你（欣宜）啦，有次做個訪問講錯嘢，話『唔知Alfred啲歌迷點睇』，搞到人哋誤會！」而欣宜就澄清自己的意思不是指兩人拍拖，只是好朋友，又笑謂之前他們一起到加拿大時，連當地親友都問兩人是否蜜運中：「之前我帶佢去見我五姨媽，佢真係以為我哋有嘢，因為我之前都未帶過香港嘅朋友返去，佢就係咁塞嘢畀Alfred食！」問到兩人可會考慮對方？Alfred笑言聖誕兩人將一起出席很多活動，希望帶歡樂給大家，欣宜即指摘他回答得差，並搞笑說：「你應該話到時可能會有啲嘢同大家宣布吖嘛！」

為健康做gym

兩人透露經常會在附近做gym，問到可有互相鼓勵大家減肥？Alfred直言大家現時不是為磅數而減肥，而是想要健康的生活。欣宜就表示工作愈忙愈要做運動，除了可以令她心情愉快，更可改善睡眠質素：「所以依家我每星期都會做幾次gym，得閒都會跑步，每個人都有唔同嘅體質同體態，只要身體健康就OK。」

文：音樂組　

攝：劉智源