傅嘉莉怕人多怯場甩Beat
傅嘉莉昨日為無綫台慶綵排表演，竟因為有記者監場而緊張到跳舞甩晒Beat，認真失威！而領軍的康華就自爆拍新歌MV整親條筋，搞到要貼膏藥，勁陰功！
藝人康華、馬蹄露、蔚雨芯和傅嘉莉（Kelly）等昨日在將軍澳電視廣播城為《萬千星輝賀台慶》表演項目「盛女三條Queen」綵排，大騷勁歌熱舞。首次在台慶有歌舞表演的Kelly，直認見到記者探班而緊張：「之前兩次排練都冇觀眾，今日見到大家就甩Beat，原來有觀眾望住係有壓力。希望後日有好表現，甩Beat時拍唔到我。」問會否想似同場的康華、馬蹄露等出歌，Kelly就直言好想試試：「本身都鍾意唱歌，又對跳舞有興趣，之前以為自己跳唔到，但原來自己係得。」
康華拍MV整傷
至於領軍人物康華亦透露十幾年沒有唱歌跳舞，所以起初非常擔心，好在都跟到進度：「都擔心正式時會蝦碌，因為要着高踭鞋，之前拍MV時着唔啱鞋，搞到整傷條筋，依家都要貼膏藥，所以原本一啲擘腿同拋起嘅動作都取消。（會着性感衫？）正常囉，會着短褲、短裙。」而新曲《伊人當自強》公開後，不少網友讚她索爆，對此她表示感謝，又謂若然不嫌她老，她會繼續多作嘗試。
文：影視組