朱晨麗斗零踭論盡累萬綺雯跌低
藝人朱晨麗、萬綺雯、郭晉安及王浩信等昨日出席新劇記者會。朱晨麗以「穿窿」裙性感赴會，惟她於台上不慎將斗零踭踩入舞台隙縫，自己kick至差點甩鞋出醜，更連累身旁萬綺雯齊齊跌倒！
昨日朱晨麗（朱朱）與萬綺雯（蚊蚊）、郭晉安、王浩信、黃德斌、譚凱琪等出席無綫台慶劇《致命復活》記者會，朱朱身穿性感「穿窿」裙及斗零踭鞋，但她論論盡盡在台上因鞋子卡於隙縫以致差點甩鞋，連累身邊的蚊蚊都「攝鞋」跌倒，嚇得王浩信及郭晉安即時出手救駕，陳庭欣則連忙幫朱朱着鞋，場面混亂又搞笑。事後朱朱笑言自己與蚊蚊是「甩轆team」，行平路都會仆倒，她說：「剛才好驚。（陳庭欣幫你着鞋？）我以為係安仔幫我，佢係我劇中偶像。（劇中做小三？）佢離咗婚嘅。」
安仔冇諗視帝四連霸
蚊蚊以傳統越南裝束到場，笑言不敢抖大氣，擔心因增磅會「逼爆鈕」，她說：「老公都叫我肥番啲好，唔好等人以為佢冇畀飽飯我食。」提到該劇結局後就舉行台慶頒獎禮，安仔被問到會否覺得較易攞視帝？他說沒有諗過成為四屆視帝：「如果發生當然好開心，但都要觀眾睇得投入。（攞多次就係四屆視帝？）冇諗過，平常心。（劇中係咪同蚊蚊、朱朱上演三角戀？）同朱朱上演纏綿戲啫，唔講就得，叫太太唔好睇新聞。其實佢知，佢會明白。」
王浩信否認以約換獎
王浩信則「賣口乖」稱從安仔身上學習，又視對方為爭奪視帝的勁敵，有指浩信提前續約換視帝獎？他否認說：「攞獎當然唔會抗拒，我都係需要鼓勵同肯定嘅演員。其實《EU超時任務》播出前已經續咗約，無論年期同內容都好舒服。（提前續約換獎？）冇，如果知道咁樣可行會嘗試申請，講笑。我相信視帝係公平公正選出嚟。（喺對手陳展鵬同安仔中二揀一？）冇辦法，我撐安仔，撐佢我有曲線得益。（對自己冇信心？）企喺安仔隔籬冇信心。」
文：影視組