46歲鍾麗緹博標尾會生慈姑椗
46歲的「性感女神」鍾麗緹與年輕12歲的內地藝人張倫碩下月8日在北京舉行婚禮，籌備事宜已進入尾聲，一對新人心情緊張。已育有三女的鍾麗緹雖然屬高齡產婦，但亦願為身為獨子的嫩夫博一鋪，將會遵照傳統，在新床上鋪椰子、紅棗、蓮子等，望早生貴子！
曾經歷兩段婚姻的鍾麗緹（Christy），下月第三度出嫁，最近忙於採購婚慶物品，做裙褂、買紅被，又買蓮子、椰子、紅棗等於新婚當日放在新床上，她說：「我知道係早生貴子嘅意思，但變得好有壓力，而朋友亦會送金豬，都係寓意生仔，咁我就睇吓鋪蓮子、椰子喺床度係咪真係可以成事！」愈近婚禮，她的心情愈緊張：「我好希望禮宴個個親朋好友都可以嚟，大家都可以開心見證我哋嘅愛，我覺得人生好美滿，開心Everyday。」
家中獨子有壓力？
張倫碩心情同樣緊張，身為家中獨子，問到父母有否要求傳宗接代？他明顯護妻，不想再加以施壓：「我都考慮到佢嘅年紀，而且我哋兩個工作都好忙，有冇小朋友好難預，如果上天畀，當然係開心事，如果冇，亦聽天由命，順其自然，我父母接受咗我哋婚姻，同樣呢方面亦都接受。」
賺錢扭轉女尊男卑
至於一直承受「姊弟戀」及「女尊男卑」的負面新聞，他的心情從未受影響，反而豁達地說：「我覺得開唔開心最重要，唔好在意別人評論，我亦唔需要別人想要嘅樣子，最重要兩人點樣開心生活，好似『狼人』曉積文（Hugh Jackman）太太都比佢大十幾歲，年紀唔係問題，最重要係心態，講唔定我以後會比依家賺多好多，我依家要努力賺錢養家，以後日子佢哋嘅一切，我都願意去承擔、去照顧佢哋，我會好努力賺錢，最近工作都排到密麻麻，之前剛拍完電影，依家又同細女（嚴稚棱）拍緊《爸爸去哪兒4》，檔期已好滿。」
文：名人組