戴凱欣逆市開舖 另闢薯途
四洲太子女戴凱欣（Kennis）掌管市值15億的家族生意，雖為富二代但亦希望憑自己能力做出一番好成績。即使現時市道不景，Kennis仍大膽引入日本餐廳及即製薯片，憑敏銳觸覺搞了不少噱頭，又安排駐場魔術師在餐廳內零距離表演，成績理想。
四洲太子女戴凱欣（Kennis）在外國讀完書回港後，一直打理家族生意，主力做市場推廣：「除marketing外，仲會發掘同引入外國嘅新嘢，上年引入日本餐廳Blue Brick Bistro，今年就開咗即製薯片店。其實即製薯片2011年開始喺日本已經有，當初開業，效果比預期中好好多，記得第一日開張，落大雨但估唔到排晒長龍。」Kennis親自落場整薯片，雖然程式上已自動化，但最重要留意時間，火候控制要恰到好處，完成後十分有滿足感，再加上可任意配搭自己喜愛的口味，創意十足。
派對包場一條龍
問到在市道低迷的情況下仍開店，經營會否有困難？Kennis說：「近呢兩年香港人有好多唔開心嘢，食係可以令人開心而且係必需品。市道唔好，可能我買少個名牌手袋，但唔會少食一餐，餐廳嘅價格夠大眾化，而且環境舒服，加上零食方面的消費唔高，唔會好受市道低迷影響。」Kennis為求做得更好，諗到將餐廳及薯片店crossover，實行一條龍服務：「兩間舖好近，好多時啲人會喺餐廳搞派對，食飯前會鍾意去即製薯片參觀，食吓零食，試過有朋友幫小朋友開生日派對，hold咗即製薯片個場，之後再到餐廳玩，大人滿意又可滿足小朋友。」
魔術師駐場變法
香港的特色餐廳此起彼落，要在市場中突圍絕非易事，Kennis說：「餐廳唔易做，所以要成日加多啲新元素，不時update新食物之餘，我哋仲引入日本magic bar嘅概念，安排魔術師駐場同你玩魔術。（成本上貴咗？）少少，但娛樂性高，以前睇魔術都係隔好遠睇唔真，依家可以互動，效果好好，所以會keep住做。」
文：名人組