志偉窒埋寶貝仔辣着阿倫還拖
歌手譚詠麟（阿倫）昨日以環球一哥身份，率領一眾師弟妹出席唱片公司活動，竟連番遭擔任司儀的好兄弟曾志偉「狙擊」，狂寸他是負累、冇人吼兼最愛出賣朋友，又「葡萄」他的兒子譚曉風讀書叻獲獎學金，搞到阿倫忍不住還拖：「吹咩！」
譚詠麟（阿倫）、劉美君、盧冠廷、郭偉亮、吳雨霏、李幸倪（Gin Lee）、江海迦（AGA）、組合Robynn & Kendy、麥家瑜、周殷廷、符致逸及韋禮安等歌手出席《環球娛樂網誌UM Webzine啟動禮》，唯獨陳慧嫻姍姍來遲。大會邀請阿倫的好兄弟曾志偉擔任司儀，雖然兩人老友鬼鬼，但自言冇收酬勞的志偉為搞氣氛，咬實阿倫狂寸！當歌手進行「放波」儀式時，阿倫的氣球未能放出，抵死的志偉即說：「你係負累。」當阿倫講到加盟環球已有四十年，志偉又寸嘴說：「咁多年都冇人搵你？」其後，阿倫透露不時玩Facebook Live，志偉再度發功：「最叻出賣朋友！」
睇淡兒子爭獎
雖然遭志偉連環「狙擊」，但阿倫仍恭喜他與曾國祥父子檔獲提名今屆金馬獎的「最佳男配角」及「最佳導演」，不過志偉竟說：「使啲錢就得！」兩人其後一同受訪，志偉坦言能與兒子同台感開心：「今次好有意義、開心同難得。（有信心？）佢（曾國祥）就難啲，對手太強。」他為兒子執導的電影能獲行內人認同而感開心：「最開心係佢社會大學畢業。」
Kary廚藝破地獄
當志偉讚阿倫的兒子譚曉風讀書叻：「真係負負負負負得正，『負負』無犬子。」身旁的阿倫終忍不住反擊：「吹咩！」提到曉風獲得獎學金時，志偉插嘴說：「咁有錢都畀獎學金佢。」阿倫即說：「人哋畀唔要呀？」志偉即提議「捐咗佢」。阿倫被問到兒子是否不問他攞零用？志偉竟又代答：「從來都冇問佢攞，係問媽咪攞！」
同場的Kary透露榮升人妻後對老公非常遷就及溫柔，還表示隔日就為老公下廚，曾被封「地獄廚神」的她指老公大讚其手勢：「佢梗係讚啦！讚先有動力。」
文：音樂組
攝：唐豁莊