張偉文賣唱籌錢傾家蕩產醫腰患
現年63歲的「靚聲王」張偉文（Donald）近年受腰患及腳痛纏繞，要坐輪椅代步，昨日他為本月中開始舉行的個唱進行綵排。雖然他外形消瘦，但表現落力。他透露11月中完騷後做腰椎大手術，手術費高達50萬，但為了能夠再次「健步如飛」，他實行賣唱籌錢，收入不穩定的他直言不介意傾家蕩產醫頑疾。
手術費逾50萬
全程坐着接受訪問的Donald透露，醫生指手術後有八成機會可以再次行路：「會切尾龍骨最底下舊骨，然後喺嗰個位補番適合size嘅假骨，而第二舊骨都有少少初期退化，所以要用骨漿補番，再整個類似烏龜嘅罩牢固啲骨。」他自爆為了慳6萬元，去年找了另一個醫生做手術，但成效差強人意，故今次找回原裝設計此項手術的醫生。他稱：「估唔到佢仲肯幫番我，仲叫我申請資助，因為我唔係好紅，唔想做完手術就冇晒錢，如果申請成功，咁我做手術就唔使錢，不過如果申請唔成功，我傾家蕩產都會做！因為有八成機會行得番，我行唔到路好耐，所以好鼓舞。（本身手術要幾多錢？）個手術要四個醫生做，淨係醫生費都已經過咗30萬，仲未計住院費，冇50萬都唔使諗。」
Donald指由於不是微創手術，故手術後要住院兩星期休息，之後再花三星期訓練行路。問到擔不擔心手術有風險？他說：「一個人都唔知幾時會離開呢個世界，總之值得做，有個希望喺度。」
開騷前打止痛針
Donald相信身體可應付五場演唱會，屆時坐住開騷的他坦言會打止痛針。提到他之前不肯收歌酬，他笑言：「係呀，之前驚有啲乜嘢，但啲錢又喺我戶口度，所以先話想唱一場收一場，但依家公司畀咗訂我先，畀啲鼓勵我。」他非常感謝歌迷朋友的支持：「真係好多謝佢哋，有歌迷話就算我瞓喺度都會嚟聽，所以好欣慰同受寵若驚，呢啲觀眾緣好難求。」
文：音樂組
攝：吳文聰