吳啟華陪讀 外國買磚頭

吳啟華、陶大宇、蘇永康、張文慈及呂晶晶等昨日出席無綫外購劇《隱世者們》飯敍，對於該劇在馬來西亞破了近兩年最高收視率，眾人表現興奮，啟華表示未知需否再到當地宣傳，但坦言若於當地有登台騷就更完美。忙於在內地拍網劇及網絡電影的他，坦言時間短兼酬勞不錯，加上劇本好及製作大，故絕對樂意參與。問到荷包腫脹可有置業？他直認不諱：「都有，香港就一個半個，內地都有啲，外國都會諗，因為個女第時都會去讀書。（你捨得？）我陪佢囉！所以要努力搵錢，依家二年級，想佢完成小學過去，佢讀國際學校條路都係咁行。」

浪子怕束縛愛拍散拖

談到早前與前妻石洋子旅遊，問到近日雙方可有溝通？他淡然地說：「不嬲都冇乜，但有保持好關係。（冇彎轉？）唔係好想轉，過慣咗單身，好舒服、好自由，但有見面，我一陣都飛北京，因為假期個女住佢度，但個女太細唔係好明離婚係乜，等佢第時大個問起先睇吓點答。」單身的他表示現時享受拍散拖：「我怕束縛，經歷咗兩次，Handle唔到長遠關係，一穩定就有問題，唔係好想煩，寧願做浪子，有家庭搞唔掂，依家女又有咪幾好！（有冇叫前妻搵番個伴？）冇刻意，等佢自己發展。（經濟上有照顧佢哋？）不嬲都有，好照顧添！我哋都係為女人而生活。」

陶大宇、吳啟華及蘇永康又合作，梗係雞啄唔斷！	張文慈（左）與呂晶晶同樣以白色裙上陣，唔通事前夾定？	趙彤低胸搶「峰」頭！

蘇永康揚言添食即到

而蘇永康對劇集會否添食表示仍是未知之數，但笑指監製鄧特希的劇集必定有伏線：「佢有成120個劇本喺腦度，唔知佢開乜啫，等佢指令，總之一叫到實返嚟，真係好多謝馬來西亞觀眾！雖然香港放盒子（myTV SUPER）睇，但So Far反應唔錯，好多觀眾仲搵番《壹號皇庭》同《妙手仁心》嚟睇，鄧特希劇本風格係一句廢話都冇，出面劇本好多不必要嘅沙石，朋友睇開無綫劇會Catch唔到！」大宇則表示無綫也有為該劇出力，但若果協助宣傳就更加好，問到是否嫌宣傳少？大宇說：「冇法，佢哋有佢哋政策，但我大膽講句，好嘢自然有人睇。」至於張文慈則透露將於下月開拍無綫新劇，暫未知對手及故事內容。

文：影視組