超蓮借肌搵方力申

昨日何超蓮以「Emotion Club大使」身份出席香港首次賽車盛事《香港電訊電動方程式》記者會，同場還有為是次賽事的賽車女郎設計服飾的時裝設計師何志恩、藝人郭思琳、羅孝勇及吳雲甫等。

漂髮唔落得水

身穿貼身衫褲盡騷收身成果的超蓮，透露近日積極操肌，已操到有馬甲線，她說：「我有私人教練，同埋有踩單車同做減磅鍛煉。（瘦咗幾磅？）冇磅過，唔係為靚，係線條。」至於屆時比賽會邀請甚麼朋友前來？她說會邀請姐姐超雲、弟弟猷啟、超盈及猷亨等，哪緋聞男友柯震東呢？她笑說：「冇請，人哋咁遠飛過嚟咩？（咁方力申呢？話佢追你？）朋友啫，但會問吓佢。（有冇機會發展？ ）我都係畀心機工作。（佢追你？）唔覺喎。（佢符唔符合你條件？）我冇確定條件，對我好就得。（佢對你好唔好？）佢對所有人都好，唔係淨係特別對我好。（請教佢游水技術？）我個頭依家漂到咁，唔游得水住，頭髮會斷，或者請教吓操肌。」超蓮指傳聞出街後亦有跟小方聯絡，二人笑笑便算，可認為對方是好男孩？她小心翼翼地說：「引導性嘅問題唔答。（同柯震東分咗手？）都冇一齊過。」

吳雲甫（左起）、郭思琳及羅孝勇擺出格鬥Pose。	設計師何志恩（左）會為賽車女郎設計服飾。	方力申操得咁Fit，畀超蓮睇中囉！

郭思琳再格鬥

至於郭思琳、羅孝勇及吳雲甫會參加賽前舉行的娛樂格鬥比賽節目，思琳正努力增磅，但食無定時，故不長肉。早前她參加了打拳比賽，操練了一段時間，笑言覺得臉上有瘀痕很有型：「幾得意吖，起碼老咗之後可以同啲孫講，婆婆後生打過拳o架！」

文：名人組