胡琳「猴」擒通山走瞓地食泥猛話正
歌手胡琳前日在城門水塘拍攝新歌《願望樹》MV，置身滿布參天巨樹的叢林，身穿肉色低胸透視裙的她渾身散發仙氣，期間導演要她躺在地上被枯葉掩面，更不停食泥，但她不覺辛苦，反而覺得開心及有歸屬感：「我性格好似鍾意通山走嘅猴子，城門水塘呢度又有好多猴子喎，我覺得自己係佢哋一分子！隻腳掂到泥嗰種感覺好正，所以我自己除鞋赤腳拍攝！」並對於加盟新唱片公司後，終有機會再推出廣東新歌感到興奮莫名。
蛋撻探班勁窩心
唱片公司高層朱明銳專程帶備蛋撻探班，幫胡琳及工作人員打氣，胡琳感激他的心意之餘又擔心其安全，因早前曾發生猴子搶行山人士食物事件：「我第一個反應係，乜唔怕啲猴子嚟爭食咩？好在冇發生咋！」胡琳日前在社交網站上載遊船河的泳裝照，被網友取笑似「蚌精」，她笑言「遊船河」也是為了拍MV，要刻意曬黑膚色才可與樹木融為一體。
另外，胡琳在《風雲5D音樂劇》中飾演楚楚一角，正積極備戰的她說：「要Keep住練歌、練戲，我同飾演步驚雲嘅鄭嘉穎最多對手戲，可以同咁多好戲之人合作，一定係個好好學習同表演嘅機會。」
文：音樂組