克勤執導奪「處男唱」 元華：上咗賊船

歌手李克勤加盟英皇娛樂後，昨日以導演身份為新歌《一個都不能少》在牛頭角大牌檔拍攝MV，並邀得兩屆金像獎最佳女主角惠英紅、金像獎最佳男配角元華、金像獎最佳女配角陳麗雲、劉玉翠等實力派演員演出。拍攝期間，克勤十分認真，不時跟惠英紅等人商討，又不斷睇playback。講到首次執導，克勤坦言很大壓力，拍攝前一晚沒有睡過，又稱為MV做了很多事前準備工夫，所花時間更可拍7個MV：「我同MV另一導演開咗一星期會，因為第一次做導演想有啲唔同。」

請食飯回謝

至於邀得惠英紅、元等演出，問可有出動友情牌？克勤坦言：「當然啦，點請得起，就算依家用人情牌都用咗幾十萬（製作費）。」他亦很感激惠英紅：「我會演出一個shot，做惠英紅個仔，本身淨係搵佢拍打我嘅shot，但同導演傾過之後，兩屆影后冇理由淨係拍兩個shot，所以叫佢做埋女主角。今日每個演員都冇問過酬勞，都係收象徵性費用，佢哋演技可以彌補我嘅不足。（拍住佢哋感壓力？）好大壓力，因為佢哋係唔會有失誤，要幾多分淒涼、委屈、流淚，佢哋係揮灑自如，係大壓力，但好有快感。（點多謝佢哋？）請食飯。」

面對惠英紅及元華等好戲之人，李克勤大感壓力。

李克勤不時重看拍攝效果，大讚各人演出揮灑自如。

夾口形頻NG

惠英紅及元華自爆其實首次拍MV，元華笑言：「TV、Movie就拍過，係MV同三級片嗰啲（意指AV）未拍過。」問到克勤執導表現如何？惠英紅大讚：「好！頭先有個shot係一氣呵成，拍得好靚，係佢主意，睇到佢做好多功課。（克勤話本身搵你拍兩個shot，依家做埋女主角會否收番足錢？）冇所謂，第一係嚟幫手，第二我未拍過，原來係唔同，要就歌詞抑揚頓挫，頭先元做口形講多咗個『啊』字要NG。」

問到可想再拍MV？元華稱已玩夠：「多一個字又唔得，事先冇講唱歌，上咗賊船先講，歌詞有句係『原來』開頭，我就話『原來……係呃人！』」提到蔡少芬為拍無綫劇推掉千萬元工作，問惠英紅可會返無綫拍劇？她說：「我冇話唔拍，係暫時未搵我，如果有好劇本我邊度都會拍。」

文：音樂組

攝：黎志輝