傅穎逃出香港北漂蛻變

等足半年 零收入

「我有寫日記嘅習慣，將過去3年所寫的一字一句分類、修葺，就係新書《向上生長，長成自己喜歡的模樣》嘅內容，內容圍繞我由2013年喺北京至今嘅種種經歷。有人問過我喺北京呢段日子係咪最辛酸，但我覺得之前辛酸太多！喺北京都有難過嘅時候，覺得人生經歷過好多唔開心嘅事，可以話係挫折，但喺北京經歷嘅係另一回事，唔關演藝圈八卦事或者大家點評價你，而係你要獨自面對一個全新環境，覺得好陌生，身邊唔會有任何人保護你。以前我一直覺得自己係個幾獨立嘅人，但點獨立都會有屋企人同朋友喺身邊。

當日我拎住5萬蚊現金去北京，因為唔係太多錢，工作又未有眉目，所以就寄居喺朋友屋企。佢冇收我租金，我就自動自覺幫佢打掃，執頭執尾同煮嘢食。之後我又搬去另一個朋友度租住空置咗嘅地方，好多時一日三餐都食公仔麵，喺北京頭半年完全係零收入，我冇諗過等咗半年都冇進帳。嗰段日子我慳到不得了，冇買過一件衫，基本上支出唔多，如果同朋友出去食餐飯用咗筆錢，之後我就好慳咁食杯麵。呢段日子嘅生活我冇同任何人講過，屋企人都唔知，因為我覺得唔需要同人講我每日食乜。」

傅穎只準備了五萬現金就隻身闖京，全靠當地朋友收留。	北漂過後，傅穎在事業上重新出發，脫胎換骨！	傅穎在北京發展尚算理想，曾參演古裝劇《通天狄仁傑》。

想點就點 冇包袱

「北京改變咗我好多，以前喺香港我唔敢出街，一定要戴副眼鏡，總係覺得好危險，去到北京先知香港嗰啲唔係叫危險。我變得好隨意，喺北京行街完全唔使化妝，着衫又求其，唔覺得自己係個藝人，只係一個演員，唔會理自己身世，好多想法都放開咗，覺得好多事都唔係咁緊要。最搞笑係喺北京同內地演員、幕後人講我喺香港嘅新聞，佢哋聽完後會話『幾好呀，至少你有新聞！』原來大家嘅價值觀唔一樣，喺我嘅角度，我寧願冇新聞都唔想有負面新聞，反而佢哋就覺得你有新聞價值，你應該覺得開心先啱。」

台灣「避難」 舒服晒

「喺北京呢半年我形容為『黑暗期』，作為『北漂（外省到北京生活及工作的人）』藝人，背後有好多辛酸史。唔係每個藝人都可以一帆風順，平步青雲，我就係個例子。我經歷過好多高高低低，覺得自己未係一個成功藝人，好多事都好被動，好多時都喺度等。未來日子我希望可以香港、內地兩邊走，香港係我屋企，我都想多見屋企人同朋友，過去呢幾年自己可能唔係好開心，所以我好少返香港，但唔覺得係逃避。當時好多人話我畀公司放逐，其實嗰刻我幾開心，喺香港實在太大壓力，本身以為自己有能力承受到，但原來已經崩潰，我希望盡快離開呢個充滿負能量嘅地方。去北京前公司安排我去台灣拍劇，嗰3個月我好開心，唔需要再面對流言蜚語，唔再有好多委屈但又冇辦法講。」

後記：好姊妹無情出賣

傅穎在北京試過遇人不淑，受訪當日，她透露對方是合作過的女經紀人。她曾視對方為好姊妹，豈料對方卻一再傷害她，甚至威脅及恐嚇她，揚言要唱衰她，令她徹底失望：「佢癲到試過去片場騷擾我，搶走我部手機，又呃我張身份證然後Check我電話，仲霸埋我喺北京租住嘅地方！我一次過畀咗成年租金，因為係佢幫我簽租約，佢話好少藝人自己簽約，結果佢清晒我間屋所有嘢，最後我拍緊嗰部戲好似一個無償演出，因為係佢幫我傾番嚟，唔知佢點溝通，基本上我拎得幾萬元，筆錢請埋助理我就乜都冇。佢係我人生一個噩夢，真係好恐怖！」

文：音樂組　

攝：劉斌

髮型：Nichol@Hair

場地：PH Hotel（九龍貝爾特酒店）