陳嘉桓上晒火何傲兒飽到嘔
藝人陳嘉桓（Rose）及何傲兒（Lily）昨日出席活動，她們先後笑言因食惹禍，齊齊抱恙到場，Rose因狂食榴槤生病，Lily則因食太多生日飯而飽到嘔！沒有男友照顧的Rose撒嬌大呻：「淨係自己煲粥食咋！」
陳嘉桓及何傲兒、范振鋒等昨日出席頒獎活動，兩位靚女都因太為食惹病上身，Rose透露近日於內地工作，一返港就狂食榴槤，以致「上火」生病：「我食咗兩日榴槤，上晒火，希望快啲好番，因為要去上海工作。（唔舒服有冇人照顧？）冇呀，淨係自己煲粥食，我通常中、港兩邊走，好難搵另一半。」
唔buy異地戀
問Rose有否於內地睇中「小鮮肉」？她說：「我唔鍾意，如果搵到，自己返香港又慘，異地戀會唔開心居多。（怕咗小三？）冇諗咁遠，但都驚。」不過，她想事業更穩定才拍拖，目前享受工作及湊細佬：「有時間都湊B，冇時間識男仔。如果搵到對象都想快啲結婚。」
認有男仔date
而Lily透露近期因生日飯局太多，狂食以致胃炎，不停嘔吐：「食得飽得滯，嘔咗十幾次！（契爺林建名有冇送禮物？）金飯碗囉，唔使其他禮物啦。上契只係儀式，我係老闆嘅藝人，要努力工作。」問Lily生日有否男仔約？她承認有了解對象：「自己好open畀人date，如果生日冇人約就要檢討自己。（即係有約？）有，做朋友先，要先多了解。但我冇心情拍拖，因為想擺多啲時間落工作。」
文：影視組