張敬軒睇全相阿Sa：My pleasure！

歌手張敬軒、Twins與許靖韻昨日到九龍塘一婚禮場地出席廣播劇記者會，軒仔、Twins、DJ司勳與花仔花女慢慢步入會場，十足行禮一樣。記者會期間，軒仔突然相士上身，提議司勳明年結婚，阿Sa聞言即問自己何時出嫁，軒仔抵死說：「你就要睇全相先知！」令阿Sa哭笑不得，場面搞笑。

軒仔受訪時被問是否經常講鹹濕笑話？他笑說：「調吓味o者。（對個個都係咁？）揀熟嘅先講，我平時好檢點，淨係唔講器官，其他乜都講。」他坦言在舊唱片公司跟「校長」譚詠麟學習緩和工作緊張氣氛：「好明顯我學壞咗，校長嘅真傳得唔到，但學咗啲偏門嘢。」阿Sa對於被軒仔要求睇全相，她爆笑地說：「My pleasure！」

阿Sa溝仔話咁易

阿Sa於廣播劇的角色對愛情比較主動，問到拍拖是否都很進取？她坦言讀書時如果感覺喜歡的人同樣對自己有意思，才會主動出擊，更未試過食檸檬：「真係冇囉！好有信心先會，冇理由搵架嚟丟！」在旁的鍾欣潼（阿嬌）即說：「嘩！我都唔敢咁講！」談到阿嬌大前晚在演唱會期間險仆，阿嬌說：「踩空咗，嚇一嚇，但冇事嘅。（演唱會第一次咁？）踩咁空係第一次。」

阿Sa笑到標眼水。	阿嬌（左起）、軒仔、阿Sa及許靖韻出席廣播劇記者會。	有小朋友喺隔籬，張敬軒唔敢講鹹濕笑話。

文：音樂組　

攝：秦健輝