張智霖隔空唱歌放閃 賀靚靚45歲牛一
袁詠儀（靚靚）昨日45歲生日，老公張智霖（Chilam）因身在英國拍攝荷里活電影而未能陪伴慶生，不過已預先送上生日禮物，更踏正12點在網上高唱生日歌隔空放閃；囝囝魔童則親自下廚為媽媽準備生日早餐。先後被兩位最愛冧爆，難怪靚靚感動說：「有你、你在身邊就好！」
縱使今個生日老公Chilam趕不及返港相伴，靚靚也不愁寂寞，前晚相約家人和親友食飯切蛋糕慶祝。據悉，昨早她要趕飛機到上海，會合大隊拍攝湖南衞視一個有關演戲的真人騷節目，Chilam稍後亦會加入。臨行前囝囝魔童相當識做，給了媽媽一個擁抱，並準備了班戟做「生日早餐」，靚靚感動地將班戟照上載到社交網向Chilam「晒命」，鬼馬的Chilam即轉發回應說：「爸爸教得真好。」
送逾13萬元靚袋
身在倫敦的Chilam當然不敢忘記這個大日子，香港時間昨日凌晨趁周末假期走到街上做Facebook直播放閃，隔空向老婆大唱生日歌，又呼籲粉絲齊齊送上祝福，他還特地在外國訂購價值逾13萬元的名牌手袋送給老婆，認真有心思！
提到隔空冧老婆，Chilam接受長途電話訪問時搞笑說：「梗係要做啲嘢啦。（名貴手袋係你送嘅？）冇錯，但成日幫襯該品牌都冇折，差啲囉。（囝囝好識做，你呷醋？）梗係唔會啦，我覺得佢不知幾乖就真。」談到英國的拍攝工作，Chilam表示最開心是遇見一些舊拍檔：「有工作人員仲要係十幾年前合作過，撞得番真係好有緣。」
至於靚靚昨日食過早餐後即出發往機場，她開心說：「生日願望都係想身體健康、工作順利啦。雖然要喺工作中過生日，但我發現原來生日搭飛機都幾好，航空公司仲送咗盒朱古力畀我添呀。」
文：影視組