林峯引狼揸胸

林峯舉行簽唱會吸引逾百歌迷撐場，席上與歌迷大玩遊戲，任由3名歌迷蒙着眼摸他的手臂、大髀及心口，當被摸到大髀時，林峯即以雙手護陰，表情尷尬。其中一名男歌迷更趁機從後胸襲，引起全場歌迷尖叫！該名歌迷與偶像自拍時又嘟嘴扮錫錫，令林峯傻笑不停，而現場有女歌迷獲林峯送抱，最抵死的是有人特製模擬精靈捕捉器，寓意要捕捉偶像！

放電男主動出擊

提到遭熱情男歌迷胸襲，林峯說：「咁平時搵男按摩師都會全身按摩，最緊要歌迷玩得開心！近年係多咗好多男仔Fans，而且演唱會都見到唔少係一家大細嚟支持，有啲支持咗我10幾年，依家仲會帶小朋友嚟睇。」問到是否因騷肌而多了男歌迷？他說：「都唔知咩原因，自己表演冇特定只係畀女Fans睇，可能男Fans鍾意睇我舞台演出。」至於可擔心吸引到「基民」？他笑說：「唔介意。（做『基界男神』喎？）都唔介意，身邊都有唔同界別嘅朋友，最緊要鍾意我嘅音樂！」過去可曾有「基民」向他示愛？林峯說：「我比較遲鈍，所以都唔知呀！有時可能會對我有啲友好表現，而我又比較Friendly。（有冇畀男仔搣過你Pat Pat？）印象中就冇，反而放電就試過！我都唔知點畀反應。（同佢講已經有千語BB（女友吳千語）？拒絕佢？）又唔使咁樣拒絕人，人哋都係Nice，打招呼啫！」

男歌迷仲嘟起個嘴想錫錫林峯！	林峯早前開騷大晒鋼條身形，又難怪「基民」流晒口水嘅！	Fans摸身摸勢，林峯即刻出手護住「小峯峯」！

此外，提到無綫重播他有份參演的劇集《創世紀》，林峯說：「係呀！我去到劇集中段先出場，仲記得係第一次演有咁多對白嘅角色！當時需要一個識講普通話嘅藝員，嗰時我啱啱喺訓練班出嚟。」可有趁機重溫劇集？他說：「唔會刻意，記得幾年前都重播過一次，嗰時宣萱仲話『乜你有份演o架！』（會唔會睇唔慣以前嘅演出？）唔會，係一個經歷，但依家都演唔番以前嘅感覺。」

文：音樂組　

攝：吳文聰