前VS天使Karolina打造星級Family

Karolina Kurkova早前第四度來港工作，大讚香港女生衣着充滿個人風格，非常多樣化，她坦言最愛周遊列國，趁機參考別人的衣着打扮。問到誰是她的Fashion Icon？她表示最欣賞美國前第一夫人積琪蓮甘迺迪及柯德莉夏萍，而較近代的則是奧斯卡金像影后姬蒂班查（Cate Blanchett），她說：「我鍾意佢成日都咁優雅，而且有自信，永遠都唔過時。」

細個為身高自卑

她自2001年起為Victoria's Secret（VS）行騷，2005至2009年間更是御用Angel，奠定超模地位，但原來她入行前是一個缺乏自信的女生，全靠投身模特兒行業，才令她覺得自己獨特又漂亮！她說：「其實我好怕醜，而且冇自信，因為我由細到大都係最高嘅女仔，而且手長腳長，從來都唔覺得自己靚。行VS騷唔會着好多衫，我喺捷克長大，連沙灘都冇乜機會去，所以一定要慢慢學習同習慣。」

Karolina坦言成為VS天使是非常獨特及美好的回憶，問到天使之間有否明爭暗鬥，她說：「我唔鍾意同人鬥，雖然唔代表同每個人都係好朋友，但我覺得自己友善同易相處。（有冇人好妒忌你？）一定會有，喺每個行業都會有人妒忌其他人，我會盡量專注自己嘅工作，唔同其他人比較，淨係要超越自己！」

Karolina衝出捷克登上國際天橋，更當選VS天使，奠定超模地位。	大仔不時學模特兒擺甫士，為Karolina與丈夫帶來不少歡樂。	放大圖片

她於2009年誕下大仔Tobin Jack Drury Kurka，去年誕下二仔Noah Lee Drury Kurka，她強調自己工作時工作、湊仔時湊仔：「大仔成日跑嚟跑去，細仔夜晚又唔瞓覺，我忙到連坐低嘅機會都冇。（想生個女？）如果有BB女，我老公一定會超級開心！其實我都想再生，不過唔會咁快，第二個仔依家仲係BB，等佢大個啲先。」

Karolina與丈夫不怕辛苦，帶埋細仔周圍飛。	放大圖片	放大圖片

雖然未知Karolina將來會否生女繼承衣鉢，但肯定的是其7歲大仔有成為模特兒的天賦，她笑說：「佢都鍾意時裝，着衫有主見，仲會叉晒腰擺啲模特兒甫士，問我點解時裝要咁擺甫士，佢覺得好得意！」

似碧咸「新家族」

問是否支持囝囝入模界？她說：「如果有工作同我一齊做，而佢又想，我覺得冇問題。其實都有好多搵我同佢『母子檔』，因為佢好靚仔，又唔怕鏡頭，相信大家將來會成日見到佢，好似咸碧一家咁，佢哋成家都好受歡迎，可能我哋一家會成為『新』碧咸家族，哈哈！」

鍾情大錶易襯衫

貴為Fashion Icon，Karolina笑言自己私下亦形象百變，假日除了穿舒適的球鞋外，有時也會穿高踭鞋，令自己看起來更女性化。她認為戴首飾能為整體造型加分，而其中一樣實用的配飾就是手錶，她透露收藏了不同類型的腕錶，方便於不同場合襯衫：「比較大啲嘅錶，男女都可以戴，所以我會同老公交換戴。有時去旅行冇戴首飾，我會拎老公隻錶嚟戴，咁就有飾物啦！哈哈！」

而她近日最愛手上的IWC萬國錶柏濤菲諾月相自動腕錶37「勞倫斯體育公益基金會」特別版，大讚百搭：「呢隻錶無論襯Tee定裙都好睇，不過唔可以同老公交換戴，因為佢鍾意大錶。」

Profile

姓名：Karolina Kurkova

年齡：32歲

國籍：捷克

三圍：34B、23、34.5

身高：1米80

入行：15歲時，朋友將她的履歷及照片寄到布拉格的模特兒公司，在當地發展不久便進軍「時裝之都」米蘭及紐約等地，2002年獲「VH1年度最佳Model獎」，2007年以年賺500萬美元成為十大賺錢最多名模第8位。

婚姻：2006年與演員兼電影製作人Archie Drury撻着，2009年奉子成婚，同年誕下大仔，2015年誕下二仔。

文：名人組

場地：Cafe Gray