張耀揚「重生」進軍賭場女友曝光
【戴佩玉澳門直擊】久違了的男星張耀揚（Roy）「重生」，近日事業與感情都有新發展，女友淼淼年輕又聽話，認真飲得杯落！回想起年前因腰患問題搞到經年臥床，他自爆一度打算輕生，問到會否重返影圈，他慨嘆：「唔排除任何可能性，不過冇人搵我喇！」
消失影圈多年的張耀揚原來已移居澳門，於當地落地生根，與女友淼淼築愛巢之餘，更與一班好友合資做生意，在永利皇宮新經營的賭廳前晚正式開幕。Roy邀請多位好友包括黃德斌、吳廷燁、吳毅將、何啟南等出席，期間淼淼以女主人身份招呼賓客，但一對戀人卻拒絕合照，問到幾時娶老婆？Roy笑說：「老婆係一座城堡，唔可以亂嚟，有好消息一定通知大家。」
Roy由電影人變身生意人，完全是機緣：「當時因為整傷條腰，嚟澳門靜養，撞番班朋友決定合資做生意。（以後唔再拍戲？）隨緣啦！」談到當日的腰患，他猶有餘悸：「一覺瞓醒就搞成咁，十級痛起碼有八級，兩年冇離開過張床，當時真係想跳樓死咗佢，後嚟接受咗個手術好番啲，但冇斷尾，我依家都唔可以坐得耐。」
德斌挑戰登喜瑪拉雅山
同樣大病初愈的吳毅將則表示，刻下會定期作身體檢查，又指稍後會返港拍攝王晶新戲：「應承咗之後，北京又有劇搵我，損失慘重都冇辦法，做人要有口齒。」而正處於休息期的黃德斌則忙於操弗體能，下月初隨無綫大隊出發試登喜瑪拉雅山拍攝特輯：「呢排戴住運動面罩去行飛鵝山，模擬當地環境希望盡快適應。我哋全隊得6人，如果成功登上4000呎都滿意喇！特輯嘅主題係『天與地』，據我所知遲啲會有另一組女藝員負責到訪廣西嘅天坑。」至於吳廷燁則忙於拍攝電視劇《無間道》，開工時要穿上冬天戲服，加上片場空氣不流通，令他幾乎焗暈。