荷里活型男畢利谷巴前日與30歲索模女友伊蓮娜，拍拖睇溫布頓網球賽，撞正24歲嫩模舊愛Suki Waterhouse同場，新歡舊愛只隔幾行遠，令伊蓮娜嬲嬲豬不時「黑面」，仲慘被直播出街，淪為網民笑柄。
41歲型男畢利谷巴（Bradley Cooper）連日來與拍拖一年多的索模女友伊蓮娜（Irina Shayk），結伴欣賞在英國倫敦舉行的溫布頓網球公開賽男單決賽。兩人不時在觀眾席晒恩愛，情到濃時伊蓮娜仲咬男友膊頭耍花槍，幾咁冤氣。
不過前日兩個就差得遠，一身黑色高衩長裙的伊蓮娜Cool爆現身，唔知係咪因為知道畢利嫩模舊愛Suki Waterhouse都同場，而且只係相隔幾行遠，即刻咩mood都冇晒。畢利雖然已經不時笑晒撩伊蓮娜傾偈，希望氹番女友，但伊蓮娜堅持請畢利食完一碗又一碗的「黑面」，更一度用手抹眼角，似眼濕濕想喊，畢利惟有勁冇癮咁坐番好，繼續睇比賽。
最慘的是，英國電視台BBC直播賽事時，直接將畢利氹女失敗的過程播晒出街，不少「食花生」的網民即將片段Cap低，放上社交網Twitter大笑特笑，話伊蓮娜個樣擺明係「等我忍到返屋企你就死」嘅表情，形容畢利咁忍得，先係場賽事嘅真正大贏家！更有網民見到伊蓮娜疑似嬲得滯，連反轉咗本書嚟睇都唔覺。
相反，與爸爸到場的Suki穿上低胸粉紅裙，少女味十足，心情靚爆。兩父女仲手指指自拍，相當溫馨。至於坐正畢利隔籬的男神班尼狄甘巴貝治（Benedict Cumberbatch）與老婆Sophie Hunter亦好恩愛，兩個不時咬耳仔，仲要偷偷地High Five，真係Sweet！同場還有男星曉格蘭特（Hugh Grant）。
文：外娛組