周秀娜撐硬葡萄牙等睇C朗除衫
歐國盃不知不覺已到了四強爭霸戰，周四凌晨將上演葡萄牙對威爾斯的賽事。兩隊各有不少圈中人支持，當中支持葡萄牙的佔多數，其中女神周秀娜力撐男神C朗，更直言想睇對方入波除衫騷肌！陳百祥亦自認私心，想C朗帶領葡萄牙隊出線！
萬眾期待的足球界盛事2016歐洲國家盃經歷多場賽事後，轉眼間已到了四強戰，首場四強淘汰賽將在本港時間周四凌晨三時舉行，由葡萄牙對戰威爾斯。不少圈中人熱愛睇波，女神周秀娜、陳百祥（阿叻）、Super Girls等力撐男神基斯坦奴朗拿度（Cristiano Ronaldo，C朗）所屬的葡萄牙，相反JW、梁烈唯等則睇好威爾斯會爆冷勝出。
阿叻：勝在有球王坐鎮
周秀娜揚言睇好葡萄牙：「葡萄牙今次好有運，之前有三場打和都可以入四強，就知道幸福之神幾咁眷顧佢哋。（睇好葡萄牙入決賽？）當然好希望葡萄牙能夠入決賽爭冠軍啦。」提到C朗，她不禁拋開女神包袱，開聲想睇男神騷肌：「佢一入波就會除衫騷肌肉，我嗰晚一定會坐定定等佢入波。」足球發燒友阿叻則客觀分析兩隊不算勁旅：「但勝在有位球王坐鎮，葡國有C朗，威爾斯有加里夫巴利。但係兩隊隊友唔爭氣，葡萄牙甚至係冇贏過波都留到四強，係運氣。威爾斯亦算好彩，由一堆二線球隊突圍入四強。」他表示很難估計誰勝誰負，但就想C朗踢出好表現，帶葡萄牙隊晉級。Super Girls、范振鋒、楊潮凱亦支持葡萄牙，Super Girls表示：「我哋覺得葡萄牙會繼續有運行，相信葡萄牙行運到決賽。」
唯唯：C朗大賽表現平平
另一邊廂，JW、梁烈唯及前無綫體育新聞主播伍家謙支持較為冷門的威爾斯，JW表示：「威爾斯前鋒笠臣簡奴雖然依家失緊業，但佢對比利時場波，一個告魯夫假身再射個靚波成名，我估今次佢都會有好好表現。」唯唯則說：「我鍾意C朗，但通常佢大賽表現都平平，葡萄牙未必每個球員都夾到佢，可謂孤掌難鳴。反而大家唔睇好威爾斯，佢依家踢到入四強喎，個心好雄。我估威爾斯小勝1：0。」伍家謙亦指睇好威爾斯會爆大冷：「歐國盃每12年會創一次奇迹，92年丹麥由外圍賽打到入嚟，仲贏咗冠軍爆大冷。到04年希臘又係爆大冷。今年又一個12年之後，我覺得威爾斯有機會。」
文：音樂組