吳雨霏長休 阿倫撐李幸倪做一姐
歌手李幸倪（Gin Lee）曾自爆早年隻身來港發展時，因成績差強人意導致冇錢交租，險些棄屋潛逃！直至今年初加盟環球唱片即獲力捧，短短半年已先後舉行兩個音樂會，有傳因而令同門師姐吳雨霏（Kary）眼紅，並意興闌珊向公司請大假，鬧出兩女不和之說！不過，昨日Gin Lee出席新碟《beGin》金唱片祝捷會時，除了獲重量級前輩譚詠麟、「阿哥」Eric Kwok、監製馮翰銘及各大電台高層捧場，成功企穩環球新人一姐地位的她，更獲死敵Kary拍片祝賀，唔通已「破冰」？
唔恨做一姐
對於被指與Kary不和，Gin Lee澄清：「唔係死敵，成間公司藝人都互相幫手。（公司將Kary嘅資源畀晒你？）咁我呢排努力啲，其實每個人都有機會，呢排專注喺我身上。（有信心做環球一姐？）唔知一姐定義，唔諗呢啲，歌曲得到認同、唱片有人買、開騷有人嚟睇已經好有成就感，買飛買碟最實際。（即係冇對手？）唔會咁去鬥。」
阿倫送「飯盒」
唱家班的Gin Lee又即席騷唱功演繹新歌《光環》，並獲「校長」譚詠麟（阿倫）送上紅館模型打氣，愛說笑的阿倫更自封為送飯盒的「Pizza Man」：「呢度（紅館）係我飯堂，食咗幾廿年，希望你一試呢度嘅私房菜，欣賞佢嘅色香味，盡情Enjoy同欣賞！」司儀隨即驚喜宣布環球已為Gin Lee入紙申請紅館檔期！
文：音樂組