《星魅博》：蔡卓妍黑白夠串 周汶錡懷舊貴婦
《東網巨星》全新娛樂節目《星魅博》播出後反應熱烈，深受觀眾歡迎，每集均請來時尚達人，為大家逐一點評女星的衣着打扮，並帶來最in的潮流小tips！今集請得香港著名設計師鄧達智（William）任客席主持，大談今季流行的懷舊色彩，兩大靚女人妻兼着衫高手─名模周汶錡PK歌手吳雨霏，周汶錡有taste，吳雨霏夠絕。
周汶錡
套衫無懈可擊，個顏色加六、七十年代pattern，好貴婦嘅人就會着啲咁嘅衫，入膊、手袋、皮鞋夾埋一齊相得益彰，件衫表現得非常有特色，非常之好taste。
蔡卓妍
條裙最特別係黑白格仔用串繩方法拼埋一齊，係hippie年代好流行，配呢對高踭鞋凸顯到佢對長腿，但如果配番黑色長boot或者白色短boot，可能更加特別。
胡杏兒翻炒長boot
呢個粗線條黑白pattern連身裙，夾番對boot係啱嘅，膝嘅長筒boot嗰個年代流行過，個手袋夾得好好。
王君馨入膊Agogo
一個改良版嘅懷舊衫，佢入膊嘅細節可以講喺60年代Agogo服裝度引伸出嚟，佢將懷舊特質放喺一條窄褲度，將佢Modernlize切合今時今日着衫嘅態度，望上去活潑好多。
張翡玶礙眼咸煎餅
See through上衫除非透得太犀利，否則好多人真空上陣，佢用咗啲肉色嘅bra，似兩個咸煎餅好礙眼，寧願着黑色嘅bra仲被接受。
吳雨霏絕色人妻
條裙印證咗係60年代興maxi時期嘅裙長度，有種飄逸感覺，甚至佢個pattern、顏色都好夾，最特別係富民族色彩手袋，襯得好絕，手指甲嘅花設計同埋對鞋完全配埋一套。
