趙雅芝醒你4招煉成超強美魔女

食得清淡、作息規律、心態平和、柔軟體操

港姐不但美貌與智慧並重，逆齡凍肌更是強項，就像同為48歲的吳婉芳及郭藹明，不單公認為幸福少奶奶，最令全城議論紛紛的莫過於是年近半百的她們仍然保持「少女肌」！早前慧妍雅集舉行的慈善晚宴盡集歷屆共46名港姐，濟濟一堂大晒冷合照。這張大合照最令全城議論紛紛，不但是考驗記憶力及眼力，看看認得出多少位港姐外，最強的焦點，莫過於是61歲的趙雅芝在眾港姐中，無論外貌與美態都冠絕全場，更被網民稱為港姐界最強美魔女，指吳婉芳及郭藹明也要甘拜下風！

趙雅芝於1973年參選首屆港姐奪第四名，為銀色旅途展開序幕，在逾四十年演藝生涯中，演活經典角色多不勝數，由七十年代至今風靡中港台視迷及掀起煲劇潮。近年內地真人騷是藝人打開北上吸金路的捷徑，早已在內地人氣高企的趙雅芝，同時也是不少內地真人騷製作單位虎視眈眈的對象，有傳有製作單位欲以天價邀請趙雅芝和丈夫黃錦燊及兒子黃愷傑亮相！

合體吸金唔容易

趙雅芝接受本報訪問時坦言一直有為內地產品擔任代言人，最近更到內地出席剪綵活動，至於會否參演真人騷，則視乎節目內容才考慮。由於丈夫黃錦燊是執業大律師，如果要在幕前演出，事前必須向大律師公會申請及獲批准。她說：「囝囝舊年都獲邀參加過關於飛行員訓練嘅真人騷節目《壯志凌雲》，佢真係完成咗一個飛行課程，可以真正駕駛飛機、累積飛行小時去考正式執照，佢非常享受成個節目嘅過程。駕駛飛機係大多數男仔嘅夢想，真人騷好多時可以完成到我哋現實中無法實現嘅夢想，所以我諗有機會受邀請嘅話，會先睇節目內容係咪適合我，先至再考慮係咪接受，我諗黃錦燊可能更需要向佢嘅公會報備同申請。」

對於被捧為美魔女，她分享駐顏秘方，就是「內外兼顧」，列出四點包括新鮮及健康的飲食、有規律的作息時間、平和的心態及持之以恒的適當運動：「我盡量做到有規律嘅作息時間，飲食鍾意比較清淡，一日三餐按時食，但有時工作時間唔容許都冇辦法！我會按唔同季節煲唔同湯水，唔偏食先可以營養均衡。至於運動，我鍾意跑步、騎馬，但戶外活動會受天氣影響，所以平時最多做係柔軟體操，可以喺屋企邊睇新聞邊做，慳時間又易啲堅持。」問到她心目中最美的港姐是誰？她認為相由心生：「只要有為社會、為他人貢獻嘅慈善之心，大家都係最美麗嘅港姐。」

拍港劇？角色要突破！　　　　　　

和黃錦燊逾三十年的婚姻，今天依然甜蜜，趙雅芝相信不單只靠愛：「最重要係兩個人有相同目標，小朋友仲細時，我會多啲時間留喺屋企照顧佢哋。依家佢哋大咗，我先出嚟做自己鍾意嘅工作，黃錦燊都一樣，佢唔使工作嘅時候，會盡量抽時間陪我，我知道佢仲辛苦過我，但咁就係為家庭同為愛嘅付出。」向來是收視保證的她不排除在香港接拍劇集：「可能之前畀大家嘅印象較深刻，好多人搵我演出嘅角色都係溫婉類型，我唔想重複，如果有比較突破性嘅角色，會比較有吸引力，我會考慮嘗試吓。」

Profile

代表作：《倚天屠龍記》、《楚留香》、《上海灘》、《刀神》、《新白娘子傳奇》

現況：1984年與黃錦燊結婚，育有一子黃愷傑，兒子繼承衣鉢，近年進軍娛樂圈。現時趙雅芝已減少拍劇，只以拍廣告及商演為主。

猜猜我是誰？ 答案

第一排：

向海嵐、趙雅芝、陳法蓉、朱玲玲、楊婉儀、王愛倫、曹敏莉、莫可欣

第二排：

關淑芬、邵珮詩、陳凱琳、張嘉兒、楊思琦、

張名雅、朱凱婷、朱翠娟

第三排：

林麗薇、朱希敏、李美珊、朱千雪、戚黛黛、

周麗明、宋愛儀

第四排：

趙翠儀、周美欣、唐麗球、王卓淇、李姿敏、黃梁靜文

第五排：

陳瑩慧、林詩慧、莊思明、岑杏賢、何艷娟、

李慕潔、李惠欣

第六排：

李潔瑩、吳幸美、文健儀、歐陽妙芝

第七排：

王殷廷、李文煊、蔡淑好、劉思希

第八排：

李秀媚、潘德惠

（前至後、左至右）

文：名人組