張繼聰「葡萄」C朗：唔公平嘅人類！
球壇男神「C朗」周三凌晨將代表葡萄牙出戰四年一度的歐國盃，不少星級球迷都萬分期待，其中「爆肌男」張繼聰卻透露對C朗又愛又恨，全因妒忌對方外表、球技樣樣掂，大嘆：「C朗係一個好唔公平嘅人類！」而陳嘉桓就決定親手炮製葡國美食，邊食葡撻邊睇波撐C朗！
足球界盛事2016歐洲國家盃已正式展開，再次掀起一股捱眼瞓通宵睇波的熱潮！球賽現正進行得如火如荼，在本港時間周三凌晨3時，將由葡萄牙大戰冰島，意味着萬眾期待的球壇萬人迷基斯坦奴朗拿度（Cristiano Ronaldo，C朗）亦即將登場！
花心機操肌練波
代表葡萄牙出戰歐國盃、集好波、有錢、靚仔有型又多女埋身的C朗，令一眾男士非常「葡萄」，連同樣練成8塊「朱古力」的藝人張繼聰都忍不住說：「C朗係一個好唔公平嘅人類！」不過阿聰私下其實非常支持C朗，過去一直有留意C朗在球賽上的表現，他表示非常佩服對方為足球所下的苦功：「佢係好專業嘅運動員，唔好睇佢有俊朗嘅外表，淨係講佢身形同佢Keep住嘅狀態，你睇得出佢花好多心機。」他更希望對方能夠帶領球隊在國際賽事上奪冠：「今次佢再代表出戰呢啲大賽，之前佢出席嘅比賽都差啲，希望佢今年除咗為球會攞多啲冠軍外，喺國際賽事上都可以攞獎，咁靚仔要圓滿啲嘛！」
陳嘉桓葡撻撐男神
除了阿聰之外，不少圈中藝人亦是C朗的擁躉，其中F Cup咪神陳蕊蕊雖然不太懂足球，但亦被C朗的靚仔樣所吸引，表示會約埋一班好姊妹齊齊去捧C朗場！而陳嘉桓（Rose）知道偶像即將上場大騷球技表示期待，更透露會以一套獨特的方法支持偶像：「我會print佢個樣出嚟整個面具戴住，同埋葡萄牙出名葡撻，我會買啲食材去整葡撻，可以邊睇波邊食，如果佢贏咗嘅話我會食夠一打葡撻！」另外，Rose昨日出席活動時，透露拍攝韓國旅遊節目時曾試做韓式針灸瘦面：「但我做完就爆微絲血管，惟有接受自己面肥。」又指將到內地拍戲，會帶備食材到當地親自下廚。
文：音樂組