周潤發大覺瞓 冇驚過
日前出席上海電影節的藝人，於浦東機場發生爆炸事件後陸續離開當地，當中「神級影帝」周潤發（發哥）於昨日安全抵港，與發嫂齊齊現身香港機場，問到上海浦東機場發生爆炸事件後當地的保安情況？發哥說：「冇乜嘢，唔擔心。（得悉機場爆炸驚唔驚？）我哋成日喺酒店瞓覺，出面咁大雨仲走出去咩？」他又稱原定前日返港，但遇上當地及香港天氣惡劣，故決定推遲一日回港。發哥提到出席電影節與劇組齊人相聚大感高興，又笑言會於新片「搞搞震」：「我會搞到城城同家輝個角色更激烈！」
袁詠儀趕入貨
同樣由上海返港的袁詠儀亦平安，昨日現身中環的超市，她極速買了不少生果及肉類，然後急急腳走人。而於上海出發到三亞的佘詩曼則於微博大晒自拍照，留言表示滯留浦東機場七小時後終於抵達目的地。
鄧紫棋被「查油」
昨日亦現身香港機場的鄧紫棋（G.E.M.），透露剛由武漢完成工作返港，到埗後即起行去做Gym：「屋企都冇時間返。」問她於武漢上機時，可有發現當地保安更為嚴謹？G.E.M.笑說：「都會呀，我有支細細支橄欖油，要開書包畀佢check，佢哋對液體好謹慎。」
而剛由倫敦返港的賭王何鴻燊四房兒子何猷君，表示母親亦擔心他的安全，他稱隨即飛往上海工作，又透露有意創業。提到他日前於網上留下霸氣「護妹」宣言，問會否管住妹妹何超欣識男友？他稱只是開玩笑，最緊要日後超欣男友疼錫她。