傅嘉莉陳山聰漏夜私奔飛車墮海

陳山聰與傅嘉莉前晚為劇集《乘勝追擊》拍攝一場連人帶車衝落海的戲份，劇情講述Kelly是賭王單立文的女兒，山聰則是其男友，兩人立心出走並與單立文展開追逐戰，卻意外連人帶車衝落海。劇組準備了假人及替身協助拍攝，由於前晚落雨致海水較混濁，拍攝過程殊不簡單，所以導演趁拍攝前安排潛水教練作講解，提醒Kelly及山聰遇到危險時要注意的細節。未曾下海游泳的Kelly與山聰要在水中閉氣30秒，她落水前非常擔心，又跟潛水教練學習吸氧氣，見山聰不時安撫她。劇組方面亦做足安全措施，除了安排潛水教練坐鎮外，亦安排蛙人在場戒備。

中途嗌Cut 上水回氣

由於拍攝場口要令整架車被海水浸至沒頂，負責拍攝的燈光師及攝影師拍攝水準要穩定，劇組亦安排多位同事一同落海協助，現場更準備了「吊雞車」將車吊落海及作打燈之用，拍攝過程尚算順利。由於拍攝場口具危險性，海水亦見混濁，劇組多次嘗試後才達到理想效果。拍攝至中段時，Kelly因又驚又凍而不停顫抖，山聰見狀即向導演要求先讓Kelly上水稍息，兩人上水後，工作人員立即遞上毛巾及熱飲。

Kelly同山聰漏夜拍攝落水戲，劇組安排多個工作人員落海協助拍攝。	水浸車廂 啲海水湧晒入車廂，山聰同Kelly都非常狼狽。	大啖吸氣 山聰被浸至沒頂，要短暫浮上水面吸氣。

二人上水後「震住」受訪，Kelly透露四年前為拍電影而學習游泳，但未試過在海中游水或潛水。她感激拍攝時有山聰傍實安慰，同時教她放鬆心情：「其實拍嗰陣都好凍，可能自己第一下落水時落得急，我不停咁震，又唔知幾時可以上番嚟，可能驚得滯覺得特別凍，一路拍一路震！」反之有經驗的山聰則指水溫比想像中暖：「其實啲海水好污濁，劇情又講我哋昏迷，唔可以張開眼，仲要閉氣。Kelly未試過，第一次拍會緊張啲，佢閉咗氣，谷住道氣就有水壓，佢愈驚就愈沉落去，危險性就仲大！其實呢啲鏡頭通常喺廠用水缸拍後期效果，今次就實境拍，不過公司都做足安全措施！」

全身濕晒 Kelly變咗落湯雞，真係搵命博！	劇組用「吊雞車」吊起「失事汽車」。	Kelly落水前跟潛水教練學吸氧氣，以免在水底出意外。

女友又係賭王千金！

此外，提到現實生活中曾與賭王千金何超雲拍拖，劇中角色同樣是追求賭王千金Kelly，山聰大方說：「劇情需要啫！我係一個演員，角色有得發揮就得。」

《乘》劇監製葉鎮輝受訪時透露公司事前有為演員買保險，亦做足安全措施，劇集之後還有爆炸、打鬥、槍戰及魔術玩火等情節，陳展鵬與山聰不乏打鬥場面，劇組本月底將到澳門拍外景。

文：影視組