最近怪行連連的加拿大麻煩小天王Justin Bieber，大前晚在克里夫蘭時因不滿Fans上前「集郵」而發火，與一名身高6呎5吋的魁梧男子動武，最終被打至「趴街」收場！
麻煩小天王Justin於美國時間周三晚在克里夫蘭睇完NBA籃球比賽後，獨自在當地一間酒店外閒逛，期間被拍得與一名身形魁梧的男子打架，當時是Justin先出手揮拳，男子捱打後還以顏色，將5呎9吋的Justin摔落地，當時有人在旁嘗試阻止但不果，過程被拍下並上載至網上。
網上有另一段短片曝光，片中疑似是Justin的男子被打至瞓地，數秒後見身邊人不停安撫他，但他似乎仍然非常憤怒，全程「起晒弶」，更想找「巨人」再戰報仇，可惜對方已消失得無影無蹤。據知，Justin事後與拳手Adrien Broner食消夜，有目擊者指當時他完全不似剛打完交。
至於與Justin大打出手的「巨人」Lamont Richmond，事後拍片「解畫」，並爆粗說：「係個死蠢撩交打先！我當時同女友人一齊，只係問條XX拎簽名，我冇其他嘢好講喇！」有傳媒邀請Lamont接受訪問，他憶述事發時正與兩名女性好友離開酒吧，途中見到Justin在酒店外閒逛，初時彼此交談了一會，然後他代友人問Justin可否合照及索取簽名，豈料Justin大為不悅，更爆粗說：「今晚唔可以簽名呀！X街！」他指Justin當時滿身酒氣，並出手揮拳，他若出盡全力，肯定會打死Justin！據知Lamont已會見律師，並計劃控告Justin襲擊，而他雖然捱了一拳，但臉上沒有任何傷痕。
至於被打到趴地的Justin事後上載兩張赤膊照片，一張是躺在床上，另一張則手握拳頭托腮，並留言：「呢個靚仔一啲損傷都冇。」不少網民都對於Justin死撐看不過眼，紛紛留言指他的照片唔靚仔！其實Justin曾跟拳王好友梅韋特（Floyd Mayweather）學打拳，今次卻被打到趴地，但梅韋特似乎很滿意「徒弟仔」Justin的表現，激讚他證明到自己不是「流料」，最重要是「打得好有Heart」！
文：外娛組