家駒紀念騷 盧巧音獻Sing
已故歌手黃家駒昨日54歲生忌，昨午約50名歌迷現身家駒墳前拜祭，除了鮮花，亦掛起紀念騷的橫額。有來自內地的歌迷表示較早時間見到Beyond鼓手葉世榮到場拜祭家駒。有深圳歌迷黃生表示幾乎每個月都會來拜祭，期間現場有歌迷唱出《光輝歲月》、《喜歡你》等。
而昨晚世榮舉辦的《家駒.....愛心延續慈善演唱會2016》，由曾志偉預先拍攝的短片揭幕：「家駒無論去到幾遠都會返嚟，家駒係香港樂壇嘅代表人物，今日大家嚟紀念佢，將佢嘅愛同精神延續落去。」周啟生打頭陣出場，彈着結他高唱《歲月無聲》，他很欣賞家駒，但笑說：「唔好成日講家駒啲好嘢，明年講佢啲醜事。」期間現場粉絲高呼：「家駒，生日快樂。」樂隊Kolor與盧巧音一齊演唱，主音Sammy與盧巧音穿情侶黑背心騷紋身，Sammy表示細個成日聽Beyond：「估唔到今日可以唱家駒啲歌。」
而太子珠寶鐘錶主席鄧鉅明及太太鄧宣宏雁昨日現身演唱會前酒會，鄧太指丈夫平常會在洗手間大展歌喉，他即笑言會唱情歌，以最經濟實惠的方法氹老婆開心，鄧太竟唱反調指一次也沒聽過。