蔡思貝 陳凱琳 女神變瘋婦

蔡思貝、賴慰玲（Winki）、李施嬅及孫慧雪等於觀塘宣傳無綫劇集《純熟意外》，眾人於比賽環節合力炮製特色咖啡及棉花糖鬥多Like，場面熱鬧。提到日前為即將牛一的陳凱琳（Grace）慶祝，蔡思貝感謝陳瀅「借場」開派對，又指一班女仔於家中慶祝更自在：「難得約到Grace開劇前同大家食飯，陳瀅仲借咗佢屋企畀我哋。我哋切蛋糕同傾偈，一班人敍舊如果去餐廳會拘謹，但喺屋企就可以除鞋、坐地下咁傾偈。」提到陳瀅日前於網上分享與思貝等外出睇騷的短片，更出手彈思貝Bra帶？思貝直言當時不禁驚叫，指對方貪玩。

至於Winki大爆慶祝會上眾女玩自拍玩到四腳朝天：「我哋切蛋糕都尖叫到超高分貝，（玩到拆天？）係呀，嚇親埋狗仔。影相時做埋高難度動作，影到腳板朝天！玩到好癲，佢哋女神外表底下都係瘋婦！」

李施嬅「純熟」客串

另外，現身谷劇的李施嬅日前被指遭思貝搶戲而淪為閒角？她澄清由始至終都只是客串，否認與思貝不和：「不嬲接劇都唔睇戲份，只睇角色有冇得發揮。（戲份有出入？）有都正常，唔會因為思貝所以減我戲。」她自爆與無綫尚有兩年合約，暫未有離巢打算。該劇監製陳耀全表示冇偏心任何演員，又讚李施嬅是有分量的演員。

文：影視組