克勤睇好愛隊入4強 浩龍撐兩英軍射手

足球界盛事2016歐洲國家盃今日凌晨已正式揭幕，本港時間周日凌晨3時將上演另一場激戰，由英格蘭大戰俄羅斯！《東網》邀得英超曼聯擁躉李克勤化身足球評述員，分析今屆歐國盃最新形勢！他透露在歐國盃中最愛英格蘭，希望效力曼聯的朗尼可以帶領隊員殺出重圍：「好多人覺得英格蘭係咪應該棄用朗尼，但我覺得大賽嗰陣有個經驗比較豐富嘅隊員係必須嘅！」又指英格蘭有哈利卡尼及占美華迪兩個「英超神射手」，期望集年輕與技術於一身的英格蘭，可直闖四強！

取消赴法保平安

對於英格蘭的對手俄羅斯，克勤指實力亦不容忽視，事關全部球員都有一定的個人實力：「第一場同英格蘭打好有重要性同決定性，如果唔輸，出線應該冇問題！同組嘅威爾斯基本上係第一次去大賽，我唔覺得呢啲『細佬波』會威脅到大佬，我諗英格蘭要出線嘅難度唔大。」他又指今屆有數隊球隊實力很接近，相信進入八強後，每場都會精彩絕倫：「今次起碼有4至5隊都好強，例如主辦國法國、世界盃冠軍德國，比利時排名都好高！」

提到不少賽事都於凌晨「開波」，克勤坦言做爸爸後要犧牲睇波時間：「有啲半夜波好多時都會錄起佢，轉頭早起身當直播睇番。」又透露本已買定門票，計劃舉家到現場感受氣氛，可惜因安全理由而取消：「本身想帶埋細路仔、外父同老竇去，但礙於大家都知歐洲好似好多危機咁，所以放棄睇波嘅念頭，今屆都係留喺屋企睇啦！」

俄羅斯體能佔優

克勤間中亦會約波友劉浩龍（師兄）睇波，師兄同樣是英格蘭忠粉，他說：「我係一顆不變心，對英格蘭係永遠都冇變過！睇吓隊長朗尼可唔可以帶住隊員先拔頭籌，呢埸英格蘭對俄羅斯都會捱夜睇。」他認為習慣在冰天雪地下踢波的俄羅斯體力方面較優勝，但英格蘭今年的水準是近十年、八年成績較標青的一年：「今年突然有占美華迪、哈利卡尼，喺英超入面加埋入咗成50球，我認為呢個新組合會擦出火花！」

另外，師兄昨日出席活動時被問到是否已為本月16日生日的女友容祖兒準備禮物？他說：「唔話你知。（祖兒話40歲前結婚？）佢成日亂講，暫時未有呢個計劃。」

文：音樂組