樂基兒撈埋打女做小四爭仔
近年香港經濟不景，不少品牌活動大縮水，令模特兒收入大受影響，連沒有拍戲12年的名模樂基兒（Gaile）亦決定不計片酬，踩入影壇殺多條財路！她將與鄧麗欣及周秀娜合演動作喜劇，飾演飛虎隊的Gaile既要打鬥又要搞笑，三女更會為爭仔大打出手，噱頭十足！
現年35歲的「前黎明嫂」樂基兒多年來主攻模特兒工作，2008年與天王黎明結婚後更是生活富足「唔使做」，2012年她在峇里島購入私人海灘及度假屋，非常識歎！
有Model半價接騷
直至與黎明結束四年婚姻後，「食自己」的Gaile為保生活質素，絞盡腦汁諗計開源，除拍廣告及行騷等收入，亦投資餐廳、首飾生意及為品牌擔任設計師，不過近年香港經濟不景氣，各品牌的預算均縮皮，不少Model收入大受影響，更有Model不惜半價接騷，紛紛謀求更多出路，就連甚少演戲的Gaile最近都決定撈多瓣再度踩入影壇！
翻查紀錄，Gaile入行初期曾演出過電影《戀性世代》及《甜絲絲》，闊別大銀幕已12年的她將「出山」，接拍由伍健雄監製、火火執導的新片《女士復仇》，與鄧麗欣（Stephy）及周秀娜齊齊擔任女主角，戲中三女各有突出性格，Gaile飾演女飛虎，娜姐演飛賊，Stephy則演女殺手，三女更Share同一男角，感情線亂晒龍。其中一幕重要場口是她們為爭仔，「正印」Stephy與「小三」娜姐及「小四」Gaile大打出手，劇情夠晒爆！周秀娜入行時曾有「翻版樂基兒」之稱，如今娜姐已升呢，再遇「原裝版」Gaile兼有對打戲，亦是一大噱頭。
三女特訓操練
據知，《女》片屬本地製作，成本及片酬不算高，惟電影計劃送到外地參加大小影展，而且劇本特別，成功吸引Gaile「出山」，因戲中不乏動作場面，三位女角事前都要接受動作訓練，相信經常做瑜伽的Gaile能夠應付裕如。
監製伍健雄表示，一看劇本就覺得角色非常適合Gaile，結果與Gaile一拍即合，他說：「Gaile好支持本地製作，雖然酬金唔多，但佢鍾意個題材。（點解搵佢做女飛虎？）我搵親角色都要啱劇本，一望就覺得係佢，上次劉美君拍《性工作者2：我不賣身˙我賣子宮》都覺得適合佢，結果出嚟效果好好。」
文：影視組