誕孖B後未收身汪圓圓：唔敢上磅！
「玩具大王」蔡志明兒子蔡加讚太太汪圓圓於一月誕下孖仔後，昨日是產後首度出席公開活動，與家姐汪詩詩現身海港城出席「梵高‧雋永時光」時計及藝術展。身形圓潤未收身的圓圓表示，生雙胞胎比較辛苦，休息較耐，問還有多少磅未減？她稱不敢上磅，但沒刻意減肥，問是否因須餵人奶？她說：「餵咗一段時間，但冇乜人奶，依家冇餵，啲人話唔好咁快減，肥瘦好容易，最重要健康。（分唔分到雙胞胎？）真人就分到，因性格好唔同，但睇相仲有時分唔到。初初買啲衫畀佢哋係一樣，依家要買唔同，易分啲，大女都會妒忌。」問有何方法補救？她說：「所以唔再生囉，因冇諗過咁快有三個BB，暫時夠晒。（老公點睇？）佢想要多啲，但見我佗得咁辛苦，所以都夠。」
老公湊B論盡
問到老公有何獎勵？圓圓說：「日日都有獎勵，佢對我好好，佢好忙，但都盡量抽時間陪我同小朋友，已好足夠。（佢識唔識湊BB？）有少少雞手鴨腳，抱就OK，所以會多啲照顧阿女。」剛過去的母親節，圓圓稱收到女兒親手做的小手工，大為感動，問老公有否代小朋友送禮物？她感動說：「以前覺得廢，冇乜用，但依家自己小朋友整畀我，即刻要裱起佢，好好保存。」對於奶奶蔡李惠莉日前受訪時重提加讚險被綁架一事，問到圓圓有否加強保護小朋友？她說：「對小朋友安全同健康都會好小心。（有冇請保鏢？）有保鏢跟身，我哋拍拖時，佢都有同我講過件事，佢好堅強，唔知真係睇唔出佢經歷過咁多，佢份人好正面，希望仔女遺傳佢正面性格。」
讚子丹好爸爸
問會否叫姐夫甄子丹教授功夫傍身？圓圓說：「學功夫好，自我保護，強壯身體。」叫姐夫教？在旁的詩詩說：「Good idea！」圓圓亦稱：「咁要家姐去游說佢。姐夫係我哋好榜樣，係一個好爸爸，我老公都好好，佢兩個好似喺度競爭邊個做得好啲。」
