湯怡挑戰跳傘拉男友壯膽

大部份人認為「80後」或「90後」不能捱苦，只懂盲目追求夢想，更有人冠以「廢青」一詞。同為「80後」的藝人湯怡（Kathy）為打破外間對「廢青」的偏見，最近參與「Dare for the best」比賽，未有任何其他工作經驗的Kathy到餐廳挑戰打工一日，她說：「其實我入行前淨係做過兼職模特兒，好想感受同了解其他行業嘅辛酸，所以揀咗做侍應。（當中有咩困難？）雖然事前準備好晒，但一開工就有客人叫我推介菜式，畀人問到口啞啞，要搵其他同事求救！其實嗰日都幾好彩，冇遇到啲難搞或者冇禮貌嘅客人。」

不忍打人推Job

外表看似柔弱的Kahty，原來熱愛各類運動，自爆想拉埋男友洪卓立「You jump I jump」挑戰跳降傘：「其實我一直以來最想挑戰跳傘，但呢幾年細膽咗，有啲想縮沙，要搵人陪我玩壯膽。（捉埋男友一齊跳？）係呀！我諗佢都應該肯陪我。」問到愛挑戰的Kathy會否有興趣參加類似《G-1格鬥會》的真人騷？她透露曾獲邀參與節目，但因忙於拍攝新戲及不忍心「打人」而婉拒接拍。

湯怡早前走去「秘撈」做侍應，畀個客問到口啞啞！	湯怡玩機動遊戲都要搵埋男友，跳降傘又點少得對方！	湯怡與洪卓立有晒「婚」數，點知家人仲心急過佢哋。

驚訝老竇催婚

至於人生另一挑戰、踏上婚姻之路，與男友拍拖多年的Kathy直言兩人有共識：「其實大家都有計劃，但起碼要到五年之後，因為依家係事業搏殺期，同埋關係都幾穩定。」她自爆輪流被朋友及父母「催婚」受壓：「身邊嘅朋友都有催過，反而父母嘅壓力多少少，就連平時唔會催嘅爸爸，今年都同我講『你哋係時候結婚』，嗰吓我有啲愕然囉！」

文：專案組

服裝：Episode（Toppy Group）

髮型：Davy Yu @ FIFTH Salon

場地：MediLASE