泳兒永不埋怨：唔好同人哋比

歌手泳兒（Vincy）近日推出新碟《鏡像》，其中五首翻唱女歌手的歌曲更是由她親自揀選：「想分享番自己一啲故事，呢五隻歌喺我成長裏面有啲特別事情。例如《天空》係我第一隻認識王菲嘅歌，我喺一個慈善節目聽到呢首歌就畀佢吸引咗，第二日去掃佢啲碟。另外亦揀咗容祖兒嘅《特別嘉賓》，係我初入行第一隻試音嘅歌。（怕唔怕外界將你同原唱比較？）壓力唔係喺個對比度，反而係首歌嘅質素夠唔夠好，冇話一定要比原唱好，原唱就係原唱，冇得向經典挑戰，想用番自己方式演繹出嚟。」

相信上天有安排

今年是Vincy入行十周年，她希望可以舉行大型個人演唱會。問她可想於紅館開騷？她坦言：「當然想，希望可以喺我唱歌事業旅途中有呢件事發生，因為係好大嘅成就，但紅館唔係話開就開，有好多考慮因素。（有冇催公司幫你搞？）我又冇催，順其自然，如果有就會有，你注定會開，個天就會安排畀你。」

泳兒翻唱別人的歌，想分享自己的故事。

泳兒是唱得之人，從來只賣實力。

Vincy被公認是唱得之人，但機會好像不及別人多，她謙稱：「我覺得永遠唔好去同人哋比，要知道周圍發生咩事，但係唔好咁樣去比較，個人會好唔開心。（思想樂觀？）我覺得要o架，尤其做呢行，好多人有抑鬱症，可能會諗個天點解要咁對我，點解佢啲嘢會多過我，但你都要諗番其實自己好多嘢都好好，咁先會去珍惜，而唔係去埋怨，同埋如果有啲人機會係多啲，可能佢真係有某啲嘢係叻過你，例如佢識得拍戲，可能咁樣又會幫到佢，所以永遠唔好去比較。」

文：音樂組

攝：秦健輝

場地：Sky Garden, California Tower

髮型：Ziv.Y（www.pi4.com.hk）

化妝：Miko Wong（Cyrus Lee Team）

服裝：Sass and Bide（Electric Sekki）