港姐增Quota玩人海戰術 歷屆最多50個名額

前港姐陳凱琳、蔡思貝、劉佩玥、朱千雪與應屆港姐麥明詩、郭嘉文及林凱恩等，昨日在將軍澳出席招募記者會。據悉今年候選佳麗名額會增至歷屆最多的50個，務求要網羅全城索女！由於候選佳麗名額大增，近年停辦的海外佳麗招募會復辦，大會下月會專程到「港姐搖籃」加拿大物色心水候選佳麗。為隆重其事，今屆賽事會到日本及韓國拍外景，更會邀請兩地的明星擔任評判。

對於候選佳麗名額增加至50人，以及有日韓明星擔任評判團，蔡思貝受訪時說：「我好貪心，咁樣可以有多啲靚女睇。以前得20個可能限制咗部分靚女，依家可以畀多啲機會畀有質素嘅女仔表現自己，選出嘅佳麗質素更加高。」劉佩玥則說：「多咗名額係好事，可以畀觀眾多啲選擇！依家日韓風吹得好勁，揀當地拍外景娛樂性會較豐富，有日韓明星做評判可以趁機睇明星！」

劉佩玥以性感造型亮相。	麥明詩以透視裝上陣，若隱若現。	歷任港姐與洪永城及王浩信出席港姐招募活動。

蔡思貝劉佩玥鬥「胸」狠

至於在活動上，蔡思貝身穿低胸裝亮相，與谷出3吋「事業線」的劉佩玥互相輝映，而穿透視裙的麥明詩若隱若現，自言是低調的性感，蔡思貝說：「係港姐記者會，所以着得隆重啲。」問到劉佩玥是否打算多以性感打扮示人？她說：「唔係，着靚啲可以吸引多啲人參選港姐。」在旁的蔡思貝又大爆金句：「性感同靚唔應該分開去講，靚就係靚，唔靚就係唔靚，冇性唔性感可言。哈哈，我成日都話我係黎明接班人！」

關禮傑乖女參選？

此外，有傳關禮傑的大女關楓馨有意參選，陳凱琳表示沒見過對方，但大讚關禮傑的太太靚，相信女兒亦是靚女；大會統籌經理余詠珊則說：「未收到消息，但係我哋好歡迎星二代、富二代參加，撇除其他嘢，呢個港姐訓練課程值幾百萬，依家免費，係入行最好方法。（星二代有優勢﹖）唔會，賽果控制唔到，大家最驚佢哋父母識得評判，但依家係用新方法選，好多人參與，好公平。」而關禮傑的太太梁安娜接受電話訪問時，否認女兒今年會參選港姐：「冇呢件事，佢依家準備緊考試，仲計劃讀碩士。（反對佢參選﹖）希望佢讀完書先，依家先得21歲，如果將來佢堅持參選都唔反對。」至於身在無錫的關禮傑則表示若女兒決定參選，做父母的會全力支持，但希望女兒以讀書為先。

文：影視組