活地性侵醜聞被消費 黑面！！

由活地亞倫執導、《吸血新世紀》（Twilight）女星姬絲汀史釗活（Kristen Stewart）及人氣男星謝西艾辛堡（Jesse Eisenberg）主演的《Cafe Society》獲選為今屆電影節開幕電影，三人昨晨與女神級配角Blake Lively現身開幕禮紅地氈，兩女分別谷胸飛釘及透視上陣，瞓身搶鏡，雖贏盡掌聲，但她們封胸出席記者會時即淪為「大茄」，僅得少數傳媒提問。

諧星主持句句挑釁

現年80歲的活地近年一年一片出爐，今次第三度有電影為康城揭幕，當然巴閉成為焦點，他於記者會上自爆不認同小圈子競爭，故從未有電影入圍競賽部分，相當霸氣！同日他與演員出席開幕禮亦獲現場嘉賓站立致敬鼓掌，不過口多多的法國諧星主持Laurent Lafitte隨後突然「抽水」，重提活地的性侵「養女」Dylan醜聞，更將他與早年強姦未成年少女的波蘭名導波蘭斯基（Roman Polanski）相提並論，並說：「你喺歐洲拍咗咁多戲，但就冇喺美國因強姦而被定罪。」全場嘉賓即時嚇一跳，有人就得啖笑，至於活地與身旁的老婆宋儀就笑唔出，即場面燶燶，場面相當尷尬！但Laurent仍未收口，更指活地的新作未入圍「主競賽單元」，擺明是因為不夠前作《曼克頓》（Manhattan）出色，完全有心辣火頭！

兒子踩多腳鬧「禽獸」

另一邊廂，活地與前女友美亞花露（Mia Farrow）的愛子Ronan多次為被指遭性侵的「家姐」Dylan發聲，日前趁活地現身康城做主角期間「贈興」，撰文鬧爆司法制度多次放過活地，更形容父親為禽獸，而且寸爆與活地合作的女星！至於姬絲汀事後亦有回應，自言不認識當事人而不能評論外，同時表示拍戲與私人事無關，自己與謝西相當享受拍攝過程！

文：外娛組