雨僑花喱Look力戰唐貝D
女星唐紫睿（Hazel）、雨僑、莊思敏、唐貝詩、陳意嵐等前晚同以性感打扮現身銅鑼灣，出席蕭定一投資的Touchbase開幕派對，雨僑以Tube Dress花裙亮相，清涼養眼，唐貝詩就以低胸裝力谷34D上圍迎戰。
Hazel參加格鬥真人騷成熱話，談到無綫找崔建邦開設同類節目，Hazel表示有興趣睇：「我參與咗節目後對呢類運動有興趣，好似話佢（崔建邦）會參加職業MMA，想像到會幾殘忍，佢雖然玩過散打，有功夫底，但呢個有一定危險性，藝人傷喺面可大可小，可能打歪、打爆鼻骨，都戥佢擔心。」
雨僑有試用公司的新服務，發現其粉絲有不少奇怪的共通點：「Touchbase係公司新服務，要做宣傳嘅公司可以用呢個服務制訂宣傳策略。我試用嗰個服務，發現原來鍾意我嘅人，竟然同時對墳場歷史、陰間資訊話題感興趣，我唔知點解，好驚！」問有否check男友羅力威的相關數據，她說：「有喺微博睇關注佢嘅人，原來同時都關注宋仲基。（你覺得佢兩個好似？）唔似，我諗係熱門嘢，鍾意宋仲基嘅人太多。」
張建聲怕紋身
同場的張建聲為配合新角色而曬黑，他說：「新戲演紋身師，我覺得瘦啲黑啲似啲，月尾過馬來西亞拍攝，我細個想紋天使翼，同朋友一齊去，佢紋先，點知支針插咗喺佢身掹唔番，嚇到我驚咗紋身！」他又表示8月會參演好兄弟王宗堯執導的新片，談到對方疑失戀，他說：「佢作為情聖咁多年，打個乞嚏就冇嘢！」
文：影視組