劉嘉玲撐童童咀女：好正呀！
與天后王菲分屬好友的影后劉嘉玲，前晚出席公關好友鄭紹康的生日派對時，透露有留意王菲女兒竇靖童疑似當街跟同性密友箍頸激吻一事，還力撐其舉動好正，揚言最重要是她找到愛錫自己的人。至於早前已承認是同性戀者的名模馬詩慧長女王曼喜，昨日出席活動時亦撑童童愛一個人不應該分性別。
劉嘉玲前晚出席著名公關鄭紹康的生日派對，同場出席嘉賓還有影后林嘉欣、蔡卓妍、視后定欣、陳知燊、薛芷倫等名人明星。
拒合唱怕拖累後輩
問到有否留意好友王菲的女兒童童疑似與同性設計師好友Rebecca當街箍頸激咀？她即力撐說：「好正呀！冇所謂，同性異性都好，又唔係犯法。（你知佢性取向？）我唔知，開心就得，我接受到好多新事物。（王菲接唔接受到？）佢應該接受到，佢咁前衞，做父母都希望仔女健康快樂，搵到溝通到、錫佢嘅人，性別冇所謂。」又謂歡迎童童來找自己傾感情事。
嘉玲續表示會支持童童出碟，大讚她唱功好，但笑言不知將她歸類為女歌星還是男歌星好，她說：「哈哈，佢打扮好型，瞬間睇好似後生嘅王菲。（佢搵你合唱你會否答應？）唔會啦，我驚拖累佢，佢同佢媽咪合唱好啲。」
王敏德認同女兒
另外，型男王敏德與太太馬詩慧（Janet）及一對子女王曼喜與王躍穎，昨日出席母親節步行籌款。問到母親節如何慶祝？王曼喜表示已準備蛋糕、Janet喜愛的品牌禮物和自製心意卡，一家人又會到上海菜餐廳吃晚飯。提到童童與同性好友激咀一事似想公開二人關係，身為同性戀者的王曼喜表示想給外界一些意見：「我覺得唔使咁大反應，鍾意一個人係唔應該分性別，我哋都係人，會有想錫想攬嘅時候，要睇開少少，唔係一件咁shocking（驚訝）嘅事， 鍾意一個人唔需要避忌，想大家明白同性戀愛唔應該被標籤。」王敏德稱絕對認同及支持女兒。
文：名人組