核心外圍塞爆數千人 黎明「Good Luck」字海完騷
天王黎明破天荒在中環海濱長廊打造香港首個4D演唱會，八場演唱會經歷重重難關，終畫上完美句號。昨晚核心外圍塞爆數千人，與核心內圍的熱鬧氣氛不相伯仲，一片浩瀚人海，為黎明演唱會寫下紀念性一頁！
黎明在港舉行八場戶外4D演唱會，總算完美落幕。昨晚每位入場觀眾都獲歌迷自發製成的手幅，上面印着「Leon」及「Good Luck」字樣，而昨晚核心內圍全場爆滿，核心外圍同樣塞到爆，由會場入口塞到九號碼頭位置，估計達數千人，黎明8時30分登上舞台說：「大家好，周末愉快，喺呢個場地係最後一日，亦係大家另一個新嘅開始，希望大家做多啲開心嘅嘢，注意安全，都有啲朋友喺外圍，大家都要注意安全，OK，我哋馬上開始，多謝。」
核心外圍的巿民擠得水洩不通，當黎明唱《我的另一半》時也幽默說：「我哋有一半喺呢度，有一半喺出面。」現場觀眾尾場特別High不停大叫「Leon」。聽到快歌又起身跳舞。當黎明準備唱《我可以忘記你》時，他說：「送隻歌畀你哋，《我可以忘記你》，呢隻係一隻反話歌。」氹得歌迷開心到暈。演唱會尾聲黎明講感言，但繼續無厘頭：「人與人之間好似朋友燒嘢食咁樣，都會有一吓會好唔捨得，唔介意大家叫我uncle或者阿叔，有啲嘢想同大家分享，但你哋唔使聽入耳，因為思想會植入個腦，細個時候睇電視，好唔想熄電視，爹哋就會用膠劍打背脊或者打pat pat，我唔會怪自己，因為我好自主，多謝每晚嚟過嘅人。」
預告「好快再見」
之後黎明又說：「好開心同大家一齊度過咗一個咁開心嘅晚上，如果有下場就繼續去下場，如果攰就返屋企瞓覺，聽日禮拜日，可以瞓到三點先起身，然後食碗麵再瞓過，而出面啲朋友都一樣，好開心可以同大家共度咁多晚，係一個好好經驗，我已經好滿足，我呢個演唱會係唔會有慶功宴，好多謝台前幕後，我會繼續做好我嘅工作，大家做好自己本份，上天係會睇到嘅，依家翳焗嘅天氣又嚟，大家做吓運動出身汗會好好多，我哋今日喺內圍，睇吓外圍朋嘅朋友係點。」臨完騷黎明再次即興玩facebook live：「Hi，我哋喺內圍，唔知邊個食龍蝦呢？依家天氣好潮濕，啲海鮮太潮濕就好易……你哋知講詳呢。」不料突然斷線，他表示雖然跟外圍朋友live chat不到，但緣分的事不可強求，最後他向日本、台灣歌迷講好快再見，音樂會在晚上10時18分完結。
昨晚捧場嘉賓依然星光熠熠，演唱會甫開始，鍾楚紅便接到黎明的黑玫瑰，其他還包括孖妹衛蘭與衛詩、金牌監製劉家豪夫婦、周柏豪等。而黎明旗下的馬天佑最近被拍到當街露械小便，記者問他拉褲鏈未？他望一望下身才說：「拉咗！」又表示剛去完廁所。
阻滯：
28/4：因帳篷未達防火要求，首場個場開場前約兩小時突然宣布「被取消」。黎明親自在facebook解釋及合十致歉，又即場以大聲公再向粉絲致歉。
29/4：千呼萬喚終於開到騷，但坐摩天輪環節需要取消。而原定8時15分開騷，延至晚上9:44開騷，11:21完場，全長僅97分鐘。
30/4：下大雨更掛黃雨，大會臨場向入場觀眾派雨褸，摩天輪環節再次取消，由於環保署要求演唱會晚上11時要靜音，令原定獻唱的22首歌曲，有3首需取消，場外亦需搭建隔音屏障。而黎明亦因胃痛不停打嗝。
2/5：獻唱期間其中一個區域帳幕失靈開唔到，10分鐘後才回復正常。
3/5：騷前天文台發雷暴警告，場地和帳篷出現大量積水，猶如瀑布。演唱期間黎明說：「耳機入咗水呀！」
創舉：
首場演出宣布取消，黎明透過社交網致歉，強勁危機處理獲網民力讚，封為「最佳關公」。
香港首個4D戶外大型演唱會，有立體投射播放，配合香味和熱氣令觀眾置身影像中，現場亦有放出飄雪效果。
購買2,980港元鑽石級門票的觀眾，可到VIP區享用美食包括鮑魚、紅酒等。場外吸引大批市民到場野餐聽免費歌。
首位藝人在演唱會玩facebook直播，獻唱《夜夜夢中見》時作4分鐘直播，吸引5萬人次收看。
金句：
「遇到問題要keep住微笑去經營一件事，其實係好難笑得出，但都要keep住笑。」
「叫我加油，即係睇住我死，下次應該叫good luck。」
「握手係一件好難決定嘅事，我只能用心去握手，但如果有任何意外嘅話，後面嘅觀眾就會因為握手而犧牲，我哋喺心靈上握緊手，我見到你，你見到我。」
「我後生時一定會有衝動，可能嗌完交會將個頭撞向牆角，或自己匿埋一角。」
「有機會畀阿媽哦嘅話，可以先dup停佢先。」
「我都有極限，唔會強迫自己講嘢，強迫自己講嘢連自己都唔信，咁做乜要講？」
文：音樂組