陳庭欣養雀氹媽咪 別有用心
今日母親節，是偉大媽咪的Big Day！一班為人子女的藝人紛紛出動表孝心，如前港姐陳庭欣一家六口（父母及三隻雀仔）總動員慶祝；剛過檔無綫的袁潔儀就陪媽咪飲茶，細說年輕時跟同學跳舞而鬧上差館的往事。至於兩女之母的名模Cara G.，笑指只要看見女兒的笑容已經滿足！
前港姐冠軍陳庭欣（Toby）昨日趁母親節前夕，孖住雙親、帶同三隻寵物雀「一家六口」一起High Tea預祝佳節，溫馨非常。面對慢熱的母親，Toby主動出擊為母Set個靚頭，母女又玩合巹交杯、餵食生果，Toby更錫錫母親，冧得陳媽媽笑逐顏開！
忙湊雀 唔催嫁
Toby是母親眼中的乖女，細時已織溫暖牌頸巾贈母，陳媽媽至今仍保存這份母親節禮物，雖然Toby已屆適婚年齡，陳媽媽並不急於催促女兒結婚生仔：「支持佢專心事業，攞更多經驗，唔使咁快結婚，我有呢幾隻雀仔已經夠忙，如果個女真係有BB，我會分心（照顧）。」母親視「雀如己出」，Toby聞言不禁陰陰笑：「媽咪有雀玩就唔會催我結婚生仔，咁我就可以全情投入事業衝刺！」不過，初中時Toby被送到英國求學及學習獨立，當時她曾怪父母掉低她，後來才明白父母的苦心，無非讓她放眼世界，故分外感激雙親！
曾反叛 今回報
被亞視拖欠薪金，近日成功過檔無綫的袁潔儀，「錢」途在手即大手筆請媽媽飲茶慶祝母親節。母女細說當年，「潔儀姐姐」不惜自爆曾是叛逆少年：「中學時跟過女同學去舞會跳舞，但畀人拉上差館，要由爸爸接我走，返到屋企，爸媽都出奇地冇責怪我喎！我中學時初戀都好口密，半句都冇同父母講過。」如今，潔儀努力回報：「陪多啲阿媽，佢之前額頭生蛇康復，記憶力差咗，日前我親手幫佢染髮，全部都忘記晒。」
至於身為兩女之母的混血女模Cara G.，大女India兩歲多，二女Freija則九個月大，趁着母親節，Cara帶同二女Freija到公園「放電」，正學行的Freija玩滑涕、鞦韆，玩得很開心！Cara既兼顧工作又要湊女，坦言忙碌及疲勞，但見到囡囡的笑容就覺值得：「佢哋兩姊妹性格完全相反，India好獨立，Freija就好依賴我。」說到最難忘的母親節，Cara表示是初為人母那年，特別感觸。
文：影視組