鄭敬基做老襯被出賣 你是上帝為我預備的另一半

鄭敬基與圈外基督徒女友Angie拍拖不足1年即閃婚，兩人昨日在香港北角基督教國際神召會舉行婚禮，昨晚在陽明山莊設宴款待親友。兄弟團昨晨前往接新娘，與Joe相識廿載的錢嘉樂擔任伴郎，但全程玩嘢，句句窒住Joe，接新娘時更掉轉槍頭「變節」幫姊妹團玩新郎，認真夠兄弟！

未出發接新娘前，嘉樂已「黎天王」上身金句盡出，被問及心情時，Joe說：「好平靜，多謝啲兄弟，NBA一班專業球星主持，就係呢一位！」隨即指向身旁的錢嘉樂，嘉樂即說：「Well，佐敦（Michael Jordan）嘛！我成日佐敦……芬蘭浴嘅！」Joe不時多謝兄弟，嘉樂笑言「聽到好煩」：「今朝7點鐘起身，攞車時佢已經講，做兄弟真係有今生冇來世，頭先又講，真係一過50歲啲人呢，內地前排好興嘛，重要嘅嘢要講3次，佢唔係o架，佢百次以上o架！」Joe聞言立即爆笑！

讀聖經闖關接新娘

兄弟團出發接新娘，Joe與錢嘉樂擁抱分享最重要一刻，嘉樂又抵死地說：「我唔係第一次聽o架喇！」似意有所指！Joe全程學黎明玩直播，片中見等開門期間，嘉樂不停搞爛Gag：「一朵鮮花插在……靚花樽。」兄弟姊妹團展開牙骹戰商量開門利是的銀碼時，他更揚言要轉投姊妹團懷抱：「我嚟食早餐啫，仲要借埋架車同做埋司機，依家我條氣唔順，所以做二五仔！」最後全靠Joe「搬上帝上枱」，在門外朗讀聖經方被放行！

入屋後，嘉樂果然「變節」出賣兄弟！其中一個遊戲要一眾兄弟抬起Joe食掛在半空的提子，嘉樂企定定「食花生」，更「手指拗出唔拗入」，禁止Joe犯規用手食提子！「舞功」一般的Joe食完提子後學女團跳舞，再高歌一曲《多啦A夢二次創作版》，雖然明知獻醜但仍頂硬上，最後更赤腳單膝跪地向Angie送上花球，成功抱得美人歸！

結婚似中六合彩

眾人其後前往北角基督教國際神召會舉行婚禮，Joe的媽媽、孿生妹妹和妹夫、他與前妻所生的大仔鄭家揚、女兒鄭依揚及多位圈中好友包括麥長青及伍允龍等都有到場。問到接新娘的情況，嘉樂坦言早已變節：「門一開我就做臥底，企喺姊妹嗰邊，負責控制同監督，多謝姊妹肯接受我！」又大爆Joe前晚撩他外出飲酒，又指Joe擔心兄弟甩底，緊張得在凌晨時分致電兄弟叫起床，他又說：「見到冇腳嘅雀仔行番路好開心！我今日整鬼佢，佢好緊張，我笑佢搞得咁好，咁有經驗，原來佢喺加拿大綵排過，兩兄弟百無禁忌，希望佢同另一半可以行埋餘生。」

文：專案組