謝西讚周杰倫勁Nice夠謙虛
魔術盜寶片《非常盜2》（Now You See Me 2）男星謝西艾辛堡（Jesse Eisenberg）受訪時提及同片拍檔周杰倫，他表示知道對方是亞洲巨星，但對方甚謙虛，完全沒有架子！
謝西早前到《非常盜2》取景地點澳門宣傳，訪問中被問到與加盟劇組的周杰倫合作如何？謝西大讚對方全無架子：「我大概知道佢喺亞洲嘅名氣，但作為美國人，我對佢唔係咁熟悉，我都知佢係搖滾明星，但相處時唔會覺，因為佢好謙遜同好好人。佢做魔術店入面嘅一個角色，表現好好。」
丹尼爾有喜劇感
《哈利波特》（Harry Potter）系列男星丹尼爾烈格夫（Daniel Radcliff）同樣是續集新臉孔，謝西大讚對方有喜劇細胞：「丹尼爾係好演員，呢個角色好適合佢。我哋鍾意即興夾對白，佢好配合到大隊，好有喜劇感。」上集女主角Isla Fisher今集換成Lizzy Caplan，有感到可惜嗎？謝西坦言：「Isla係好朋友，個人層面上佢拍唔到我覺得好可惜，但佢係因為大肚所以辭演，係一個好美好嘅理由。而Lizzy喺今集入面好好笑，雖然換咗女主角但一樣咁好睇。」
謝西透露今集劇情在上集幾個月後發生，其角色本來與隊友進行地下工作，但被富豪綁架，要他們執行一個新任務。電影中人人身懷魔術絕技，謝西亦配合角色訓練：「今集我花咗幾星期練一個用手機玩嘅魔術，不過睇戲時唔會特別顯眼，因為最搶鏡始終唔係小手段，而係大場面。」謝西指今集與上集一樣充滿娛樂性，有動作場面但不暴力，注重機智與團體合作，情節建基於現實中的魔術，不是天馬行空。
10年前去過澳門
謝西原來並非首次踏足中國，他表示10年前到過澳門：「我10年前嚟過，感覺好唔同，我唔記得當時有咁多賭場。我嗰時喺亞洲旅行，由北京去到西藏、尼泊爾等等，因為好奇我亦有到澳門。澳門係前葡萄牙殖民地，受到外來文化影響，係好有趣，無論地理同面貌都好獨特。」
被問到未來想演甚麼角色，謝西表示：「直至收到劇本前，我都唔會知想做咩角色。我以前成日接到好多『緊張型』角色，但我想試吓唔同嘢，所以先拍呢個有啲自私又驕傲嘅魔術師角色。」他笑言角色與《蝙蝠俠對超人：正義曙光》（Batman v Superman：Dawn of Justice）中的奸角完全不同：「我喺嗰套片係個邪惡癲佬，呢部只係玩魔術，冇話要殺人囉。」
文：外娛組