姚子羚下一站視后

「多謝鞭策、批評我嘅人」

我對上年嘅成績好滿意，係好大嘅鼓勵，冇預期有咁嘅成績，不過有啲地方可以做得更好。攞獎我覺得係天時、地利、人和，自己咁啱有幾套劇《四個女仔三個BAR》、《張保仔》接住播，因為咁，大家可以睇到我角色上有唔同嘅變化，咁啱大家又鍾意我嘅角色。講真曾經都恨過攞獎，但已經過咗呢個階段，不過攞獎係一個肯定，一定係開心嘅。

冇獎攞嗰段時間自己會特別努力，會諗係咪自己做得唔夠好所以冇獎攞？係咪要再努力啲呢？我好同意田蕊妮所講，攞獎唔係你一個人攞，係所有幫過姚子羚、鞭策過姚子羚、甚至係批評過姚子羚嘅人，每一分力量都令我做得更好，同埋係監製、導演、工作人員嘅努力。

姚子羚認為現階段攞獎，見證到自己的進步。	「多謝監製陳維冠。」	「可能會突然嫁o架！」

「見證成長，感覺好實在」

入咗行十幾年，台慶頒獎禮「最佳女配角」係我第一個獎項，有人會戥我唔抵，覺得我攞得遲，但自己從來冇咁諗，我覺得有心唔怕遲，反而我覺得依家攞獎，感覺好實在。獎項對我嚟講係一個經歷，見證我每一個階段嘅成長，如果自己做得唔好亦唔奢望僥倖攞獎，反而依家攞獎可以見證自己進步，雖然可能未必係最好，但一定會愈做愈好，呢個獎好似同我經歷過好多，感覺好實在。

陳維冠：「你可以仲好啲！」	在馬來西亞星光薈萃頒獎典禮奪獎，令姚子羚印象難忘。	《四個女仔三個BAR》

有啲人會話攞女配角獎證明你係實力派，自己就冇諗少女派定係實力派，我相信係時間問題，自己唔覺得一個女仔一出嚟做戲就好叻，演技好大部分係由人生經歷、生活得來，如果依家人哋覺得我係實力派，我會覺得好開心，證明自己慢慢成長。

姚子羚入行十四年，去年勇奪雙獎，是事業上一大突破。

放大圖片

「Upgrade自己，加強演技」

攞獎之後壓力一定有，唔係大家所諗嗰種壓力，而係想演繹唔同角色都畀到大家見到有咩唔同，呢方面真係好花工夫。好多人問我下個目標係咪視后，咁自己都希望可以一路行落去，不斷有進步，愈做愈好，更加要Upgrade自己，等自己演技更加好！

人成長咗，特別珍惜一啲肯話我嘅監製，咁先會有進步，雖然有時會打擊到信心，我會問自己識唔識做戲？要好好去調節心態，喺心態上無時無刻當自己係新人，我就係一個演員，要接受人哋話畀你知有乜做得唔好。而自己就要虛心接受，好好去消化人哋嘅意見，再去改進。

「我唔弱質纖纖，好硬朗」

我特別多謝監製陳維冠，佢同我講一番說話：「子羚，其實你可以更加好！」提醒我去研究多啲角色嘅另一面，好似佢搵我拍《四個女仔三個BAR》，佢睇到我另一面，一般人覺得姚子羚弱質纖纖，但真實嘅我其實唔係咁，我好獨立、好硬朗、好男仔頭，好多謝監製嘅鼓勵說話。

好姊妹胡杏兒結婚，好多朋友都問幾時到我，我未有時間諗，等事業再穩定啲先再諗，隨緣啦，要到就會到，暫時未有計劃，自己唔鍾意計劃定，話唔埋可能會突然間o架，時間嚟就嚟o架啦！結婚係開心事，依家啲觀眾好明白事理，如果結婚我會公開，不過，我性格比較內斂，如果將來結婚可能會揀外國，搵個寧靜小島，簡簡單單結婚，希望大日子可以好簡單、好輕鬆。

後記：

姚子羚字裏行間經常將一班「胡說八道會」好姊妹掛在口邊，可見她們感情十分深厚，在競爭激烈的娛樂圈實在難得。去年連掃兩個女配角獎項，姚子羚覺得「馬來西亞星光薈萃頒獎典禮」奪得「最喜愛TVB女配角」獎感受特別深刻，因為當時幾位好姊妹胡定欣、李施嬅等都在場陪伴她攞獎，令她感動又珍惜。

採訪：影視組

攝影：劉斌

服裝：Miss Sixty 化妝：Sammy Lam

髮型：Taylor Wan（Hair Corner）

場地：Three On Canton（港威酒店）