5大索媽0走樣！Fit爆秘技

鄭希怡 為梁浸浸追多個

索媽鄭希怡（Yumiko）時常將愛女梁浸浸的相放到網上分享，不少人讚梁浸浸可愛之餘，亦讚Yumiko生完一樣Fit爆，Yumiko說：「未生之前我118磅，完全冇睇營養師，或者係諗住瘦住嚟佗B，我嗰時好放任食，諗住畀自己好轟烈咁肥一次，結果肥咗38磅。」她表示初期只是散步和均勻飲食減肥，三個月內瘦了廿幾磅：「但有十幾磅點都瘦唔到落去，所以我覺得係要做運動，嗰時我揀咗泰拳，要用晒全身、消卡路里會多啲，打咗個幾月瘦咗十磅，依家係鍾意咗運動，又會做練肌肉嘅訓練，同生之前差唔多磅數，仲Fit過未生之前。」

講到梁浸浸在母親節滿13個月，Yumiko表示會帶囡囡去澳門探嫲嫲：「幾開心，好多朋友好錫佢，係福氣。」她又笑言對梁浸浸沒太多期望，最重要健康：「想佢享受自己生活，依家呢個階段，做媽咪好簡單，佢每次望住你笑，錫你一啖，或者叫你媽媽想抱，佢需要你個感覺已經好滿足o架喇！」

囡囡梁浸浸13個月	陳自瑤 35歲 囡囡QQ 4歲	黃婉君 36歲 大仔Dylan 5歲 細仔Daniel 3歲

陳自瑤 囡囡唔黐王浩信

陳自瑤（Yoyo）與藝人王浩信育有一女QQ，今年4歲。雖然Yoyo已貴為人母，但身材仍然Fit爆，偶然在社交網站上載三點式照片，令不少網民都激讚索爆！由於老公浩信經常要拍劇，故QQ都是跟Yoyo，Yoyo說：「係呀！QQ係黐我多啲，今年母親節佢都有禮物送畀我，佢話整咗條手鏈畀我，不過我仲未收到，今年母親節都係同全部母親一齊慶祝，好似媽咪、奶奶、太嫲咁。」Yoyo坦言平時跟QQ相處時都好Sweet，又指QQ喜歡唱歌、畫畫，更有她們二人的主題曲：「我哋作咗一首我哋嘅主題曲，叫做《小寶貝》，呢首歌係屬於我哋兩個，我哋成日都會一齊唱，感覺好Warm！」

岑潔儀 29歲	囝囝Damian 1歲3個多月	周汶錡 41歲 囝囝Jacques 10個月

黃婉君陪囝囝踢波當運動

前組合2R成員黃婉君（Rosanne）育有分別5歲及3歲的兒子，樣貌及身材保養得宜，跟入行時一樣索爆！談到Keep Fit之道，她說：「我想變番生之前比較結實嘅肌肉，一星期做四次瑜伽，其他時間跟住小朋友做活動，同佢哋去田徑、踢波、游水。我生完BB開始食有機糙米，每餐七成菜三成肉。」提到母親節，她稱上星期已跟媽咪及妹妹做水療慶祝，正日與老公、奶奶及老爺慶祝。禮物方面，她說：「見到小朋友畫畀我嘅母親節卡，覺得好感動。」

岑潔儀 Keep住24吋腰

藝人岑潔儀（Zoey）嫁給馬來西亞富商後誕下兒子Damian，未知是否餵哺母乳關係，Zoey收身很快，Keep住24吋纖腰，不時穿貼身衫大晒美好身段。談到母親節，她說：「係我第2年同囝囝過，老師教小朋友整皇冠送畀媽咪，好靚，會保存。」她直言餵哺母乳感覺深刻：「彼此好親密，二合為一！餵哺母乳期間好辛苦，捱得過都算好叻！見到囝囝健康成長，覺得值得！」她將會把餵母乳心得寫成書，收益撥捐慈善用途。

周汶錡 最緊要有得生

名模周汶錡去年誕下兒子Jacques，產後一個月極速回復生前的身材：「大肚重咗18磅，BB重7磅幾，生完之後好快瘦番，一個月去番110磅未生前嘅體重，係自然瘦，可能係遺傳，我媽咪生我都係好快瘦番！」今年是第一年與兒子過母親節，10個月大的Jacques，人見人愛，因經常亂爬，令周汶錡要打醒十二分精神看顧他，坦言恨再生的她稱生仔生女冇所謂，最緊要有：「原本最想生女，但生仔都好，等Jacques同細佬可以打交大。」她稱母親節會約媽咪和奶奶慶祝。

文：娛樂組