陳嘉容戴逾億珠寶 險失耳環
名模陳嘉容昨日擔任拍賣行預展模特兒，示範逾億珠寶，她直言緊張到熱血沸騰！而經驗老到的她，更自爆出場前險跌耳環，幸眼明手快用手接住，有驚無險。
名模陳嘉容昨日（Eunis）出席拍賣行預展，示範多款拍賣的珠寶首飾，全場最矚目的，要算是估價達一億五千萬元的巨型綠寶石鑽戒，連Eunis也驚嘆是她從事模特兒以來，佩戴過最名貴的首飾，揚言緊張到熱血沸騰，她並自爆出場前的驚險事：「頭先一隻耳環冇扣好，跌咗落嚟，好彩我用手接住咗。以前又試過戴條珍珠鑽石鏈，但係突然斷咗，珍珠跌晒落地，嗰時有一粒搵唔到，原來喺我鎖骨上面，所以我覺得自己同珠寶都幾有緣。」
心意最重要
她表示因工作關係有機會佩戴不同的名貴飾物，但自己買不起，故沒有特別收藏。問到對小鑽石是否已看不上眼？她說：「我個人高大，細粒都唔襯，大又買唔起，所以都係抱平常心，喺工作上滿足自己。（衫同珠寶鍾意邊樣多啲？）兩樣都鍾意，好似豉油同雞。衫要同首飾配襯。（有冇追求者送過名貴首飾畀你？）冇喎，我都想有。試過有人送手製、心意嘢。（打動唔到你？）價值同心意揀，我都會揀心意先，如果對對方冇feel，畀價值定心意都係冇feel，女人感覺好重要。」
據知昨日幸保不跌的翡翠蛋面耳環，估價達580萬元，事後Eunis表示出席預展前，毋須簽署任何合約，而她亦相信大會有意外保險，故並不擔心。
文：名人組