鄭欣宜 陳嘉佳肉女稱霸
歌手鄭欣宜（Joyce）和陳嘉佳（小寶）兩位「重量級」藝人憑「肥妹當自強」的形象深得民心，Joyce以歌唱實力加上「唔扮嘢，做自己」的個性成網上點擊紅人，密密賣自家品牌曲奇的她更賺到笑；小寶最近則以五位數字酬勞擔任晚裝代言人，為一系列「肥妹晚裝」拍攝硬照。
賺錢開cafe
被網民封為「女神」的Joyce昨日穿透視「巨咪」的魚網裝，現身美食車嘉年華賣自家品牌曲奇，問她曲奇營業金額達多少？她指金錢問題由拍檔處理，但直認賣曲奇有賺錢：「少少啦，比預期中good，回本已經開心到笑！」她希望生意愈做愈大，打算開cafe或獨立店。
Joyce更「胸」降《東網》及《東網巨星》facebook直擊，讓fans「與神對話」，有網民問她：「係咪真係好鍾意食嘢？」她好坦白話：「肥人通常都好鍾意食嘢，而我亦無謂呃你，我係好鍾意食好食嘅嘢。」有網民讚她可愛時她即扮嬲，笑說：「我係行性感路線o架。」
小寶勤力接Job
代言「肥妹晚裝」的小寶日前拍攝硬照，換上三套晚裝，獲四位工作人員服侍，盡顯氣派，她亦賣口乖大讚晚裝夠特別：「今次呢個系列係專登整畀肥人着，因為肥妹好難着靚嘅低胸晚裝。」談到過去一年，小寶好像「消失」幕前，她解釋：「呢一年我成日飛，舊年主要係接Job，飛嚟飛去，我計過飛過20次左右。（夠錢買樓？）都唔係好夠，我價錢唔係好貴o架咋！」她將會返無綫拍劇：「會有三套劇，之後有機會返內地做綜藝節目。」
文：音樂組、專案組