糖妹 蔡國威狂煲億元橫財夢
今晚六合彩彩金高達一億港元，多位藝人爭住投注望一夜升呢做億萬富翁。糖妹望中獎後入股唱片公司做老闆，蔡國威則望在亞洲各地置業，JW則想包起成條村，眾星各有精彩橫財夢！
全城熱捧今晚高達一億港元彩金的六合彩，曾主持六合彩節目的蔡國威及周嘉莉、港姐王卓淇、歌手糖妹（黃山怡）、張惠雅（Regen）、JW（王灝兒）以及SIS樂印姊妹的駱胤鳴都湊熱鬧，望一注獨得，圓「億元發達夢」！
JW買起條村畀屋企
講到中獎後如何使用獎金，眾星均眉飛色舞。糖妹說：「想買第一間安樂窩，再幫補吓出碟，之後成立一個基金幫助獨居老人，最瘋狂就係想入股唱片公司做話事人！」有「六合彩之子」之稱的蔡國威着住紅褲去投注，望在香港、台灣及泰國等地置業，又想買私人飛機到處旅遊。Regen則笑言想邀請偶像BoA同G-Dragon（GD）炮製跳舞快歌，JW則最大想頭：「想買成條村，我、家人同好朋友都係鄰居，一出門口全部都係好朋友喇！」至於駱胤鳴搞笑想在TVB買起一個時段自己做節目！乖乖女王卓淇表示會包起一家20人到歐洲旅行。而眾星都相當有善心，不約而同表示會將部分獎金留起做善事。
阿叻劫後重生做慈善
至於一向甚有賭運的陳百祥（阿叻），直言有留意億元六合彩，雖然自己冇買開但一直好支持朋友去買，善有善報。上月與黃杏秀、譚詠麟到法國阿爾卑斯山滑雪，險差錯腳在雪山滑落的他謂：「嗰日喺法國雪山，一時唔小心成個跣落十呎遠，但好彩一啲事都冇，連擦傷都冇。（嚇親黃杏秀？）冇，佢同阿倫（譚詠麟）行前面睇唔到。」阿叻坦言做得善事多自然好運來，視六合彩為慈善一種的他，亦有心水號碼提供，望大家輕鬆買，他笑言：「我喜歡一啲有3、有8嘅傳統號碼。」
文：影視料